Shanhaıda Abaı shyǵarmalary qytaı tilinde jaryq kóredi

NUR-SULTAN. QazAqparat – QR Prezıdentiniń Qazaqstan halqyna Joldaýy týraly pikir bildirgen Jazýshylar odaǵynyń tóraǵasy Ulyqbek Esdáýlet súıinshi jańalyǵymen bólisti, dep habarlaıdy QazAqparat tilshisi.

Aqynnyń pikirine zer salsaq, keler jyly toılanatyn úsh úlken datany atap ótýdiń formatyna jańashyldyq qajet.

«Memleket basshysy óz Joldaýynda rýhanııat taqyrybyn da qozǵady. Sonyń ishinde Ál-Farabı 1150 jyldyǵyn, uly Abaıdyń 175 jyldyǵyn, Altyn Ordanyń 750 jyldyǵyn toılaý týraly sóz qozǵady. Bul ǵıbratty datalar urpaqqa tálim berýimen qundy. ıAǵnı, ysyrapshyldyqqa, asta-tók meımanasyna, masaıraýǵa jol berilmeýi kerek. Joldaýda da bul sharalardyń urpaqqa paıdaly, qoǵamǵa kerekti, keleshekke ónegeli jaqtaryn ustaný kerektigi aıtyldy. Altyn Ordanyń 750 jyldyǵynda qazaq tarıhyna álem nazaryn taǵy bir aýdartý, sol arqyly týrızmdi damytý kózdelgeni de kóńilden shyǵyp otyr. Óıtkeni, Altyn Ordanyń tarıhy – bizdiń tarıh. Bizdiń tarıhymyz – Altyn Ordanyń tarıhy», - deıdi U.Esdáýlet.

Jazýshylar odaǵynyń basshysy bul talapqa qalamger qaýym da úles qosatynyn aıtady.

«Úsh toıdy da ǵıbratty etip ótkizý kerek dep jatyrmyz ǵoı. Mysaly, Qytaıdyń Shanhaı qalasyndaǵy bir baspa Muhtar Áýezovtiń 10 tomdyǵy men Abaıdyń 1 tomdyǵyn qytaı tiline aýdaryp shyǵaratyn boldy. Atalmysh baspa Shyńǵys Aıtmatovtyń 10 tomdyǵyn shyǵarǵan eken. Sondaǵy aǵaıyndarymyz Sh.Aıtmatovtyń ustazyn nege shyǵarmaısyńdar degen maǵynada usynys tastaǵan eken, kelisipti. Sony estip, M.Áýezovtiń de ustazyn shyǵaryńyzdar degen oı aıtqanbyz. Birden kelisip, Abaıdyń 10 tomdyǵyn shyǵaratyndaryn aıtty. Abaıdyń barlyq shyǵarmasy bir tomnan aspaıtynyn túsindirip, kelisimge kelip qaıttyq», - deıdi Ulyqbek Esdáýlet.

Eske salsaq, QR Prezıdenti Qasym-Jomart Toqaev óz Joldaýynda Altyn ordanyń 750 jyldyǵy týrızmdi damytý turǵysynda toılanatynyn aıtty.