Shanhaı Yntymaqtastyq Uıymynyń óńirlik terrorızmge qarsy keńesi 40-shy otyrysyn ótkizdi

ASTANA. QazAqparat - Astana qalasynda Qazaqstan Respýblıkasynyń tóraǵalyǵymen Shanhaı Yntymaqtastyq Uıymynyń (ShYU ATQQ) Óńirlik terrorızmge qarsy qurylym Keńesiniń 40-shy mereıtoılyq otyrysy ótti, dep habarlaıdy QazAqparat UQK baspasóz qyzmetine silteme jasap.

Oǵan Úndistan, Iran, Qytaı, Qyrǵyzstan, Pákistan, Reseı, Tájikstan, Ózbekstan quzyretti organdarynyń jáne ShYU ÓTQQ Atqarýshy komıtetiniń delegatsııalary qatysty.

Baıqaýshy retinde Belarýs jáne Mońǵolııa ókilderi shaqyryldy.

Otyrysqa qatysýshylarǵa Qazaqstan Respýblıkasy UQK tóraǵasy Ermek Saǵymbaev quttyqtaý sóz sóıledi.

Ol ShYU ÓTQQ qurylǵannan beri uıymnyń damýyna eleýli úles qosqanyn, aımaqtyq jáne jahandyq deńgeıde terrorızmge, separatızmge jáne ekstremızmge qarsy kúrestiń tiregi jáne úılestirýshi ortalyǵyna aınalǵanyn atap ótti.

Forýmda terrorızmdi qarjylandyrý arnalaryn anyqtaý jáne jolyn kesý, sondaı-aq qarýdyń zańsyz aınalymyna qarsy is-qımyl máseleleri qaraldy.

ShYU-ǵa múshe memleketterdiń terrorızmge, separatızmge jáne ekstremızmge qarsy is-qımyl jónindegi yntymaqtastyǵynyń 2022-2024 jyldarǵa arnalǵan baǵdarlamasyn oryndaýdyń aralyq nátıjeleri shyǵaryldy.

Aldaǵy kezeńge arnalǵan josparlar talqylandy.

Osylaısha, Úndistan Respýblıkasynyń aýmaǵynda ınternet jelisin terrorıstik, separatıstik jáne ekstremıstik maqsattarda paıdalanýdy boldyrmaý boıynsha semınar men birlesken oqý-jattyǵý ótkizý kózdelgen.

Sondaı-aq, taraptar óńirde turaqtylyq pen qaýipsizdikti saqtaýǵa baǵyttalǵan birlesken jobalardy jáne ózge de sharalardy iske asyrý týraly qorytyndy qujatqa qol qoıdy.

Qytaı Halyq Respýblıkasynyń aýmaǵynda ShYU ÓTQQ kezekti otyrysyn ótkizý týraly ýaǵdalastyqqa qol jetkizildi.