Shanhaı yntymaqtastyq uıymyna 2019-2020 jyldar aralyǵynda Reseı tóraǵa bolady
Jıynǵa tóraǵalyq etip otyrǵan Qyrǵyz Prezıdenti Sooranbaı Jeenbekov eń aldymen Qazaqstan Prezıdenti Qasym-Jomart Toqaevty saılaýdaǵy jeńisimen quttyqtady, dep habarlaıdy QazAqparat tilshisi Bishkekten.
«Osy múmkinshilikti paıdalanyp eń aldymen Qazaqstan tarapyn saılaýdy tabysty ótkizýimen quttyqaımyn. Qurmetti Qasym-Jomart Kemeluly, saılaýdaǵy Sizdiń jeńisińiz qazaq halqynyń ózińiz tańdap alǵan saıası jáne áleýmettik-ekonomıkalyq jolǵa degen zor senimin bildiredi. Sizge zor densaýlyq jáne memlekettik qyzmetińizge tabystar, baýyrlas Qazaqstan halqyna beıbitshilik pen gúldený tileımin», - dedi keńestik keńeıtilgen otyrysyn ashqan Qyrǵyz Prezıdenti.
ShYU-nyń damý jaı-kúıi men keleshegi jaıynda pikir almasylyp, óńirlik jáne halyqaralyq ózekti máseleler talqyǵa túsip jatqan otyrysqa Qyrǵyz Prezıdenti S.Jeenbekov tóraǵalyq jasap otyr. Jıynǵa Qazaqstan Prezıdenti Qasym-Jomart Toqaev, Úndistan Premer-Mınıstri Narendra Modı, QHR Tóraǵasy Sı Tszınpın, Reseı Prezıdenti V.Pýtın, Pákistan Premer-Mınıstri Imran Han, Ózbekstan Prezıdenti Sh. Mırzıeev, Tájikstan Prezıdenti E.Rahmon qatysyp otyr. Munan bólek, sharaǵa baıqaýshy elderden Aýǵanstan Prezıdenti A.Ganı, Belarýs Prezıdenti A.Lýkashenko, Iran Prezıdenti H.Rýhanı, Mońǵolııa Prezıdenti H.Battýlga qatysýda.
Otyrysy sońynda Memleket basshylary 14 qujatqa, onyń ishinde 13 sheshim men ShYU-ǵa múshe memleketter basshylary keńesiniń Bishkek delaratsııasyna qol qoımaq. Sonymen qatar otyrys aıasynda BAQ, sport, densaýlyq saqtaý, ShYU-nyń halyqaralyq baılanysyn keńeıtý salalaryndaǵy yqtymaqtastyqty qamtıtyn 7 qujatqa qol qol kózdeledi.
Qazaqstan tarapy bastamashylyǵymen ázirlengen densaýlyq saqtaý, ShYU-nyń «Astana» halyqaralyq qarjy ortalyǵymen ózara is-qımyly, tsıfrlandyrý jáne aqparattyq-kommýnıkatsııalyq tehnologııalar, «ShYU-Aýǵanstan» baılanys tobynyń munan arǵy is-qımyly syndy salalardaǵy yntymaqtastyqty damytýǵa baǵyttalǵan qujattar da rásimdelmek.
Sondaı-aq sammıt aıasynda Qazaqstan Prezıdenti Qasym-Jomart Toqaev shaǵyn jáne keńeıtilgen quramdaǵy jıyndarǵa qatysyp, aımaqtyq jáne Uıym sheńberindegi yntymaqtastyq máseleleri boıynsha sóz sóıleıdi.
Aıta keterligi, 2019-2020 jyldary uıymǵa tóraǵalyq Reseı tarapyna ótedi jáne Shanhaı yntymaqtastyq uıymyna múshe memleketter basshylary keńesiniń kezekti otyrysy 2020 jylǵa josparlaǵan.