Shanhaı bıligi COVID-19 shekteýlerin jeńildetip jatyr

BEIJІŃ. QazAqparat – 1 maýsymnan bastap Qytaıdyń Shanhaı megapolısinde antıkovıdtik sharalar jeńildeıdi, dep habarlaıdy QazAqparat menshikti tilshisi COVID-19 profılaktıka jáne baqylaý shtabyna silteme jasap.

Shanhaıda turǵyn úı keshenderiniń turǵyndary úshin shekteýler alynyp jatyr. Orta jáne joǵary epıdemıologııalyq qaýip aımaǵyndaǵy turǵyndarǵa áli de syrtqa shyǵýǵa ruqsat joq. Jańa ereje sársenbi kúni kúshine enedi.

Qoǵamdyq kólik jumysy (avtobýstar, paromdyq qatynas, taksı qyzmeti) qalpyna keltirilip jatyr. Qala ishinde qozǵalý úshin jeke avtokólikterdi qoldanýǵa ruqsat beriledi.

Shanhaı bıligi qala turǵyndaryn jeke qorǵanys sharalaryn saqtaýǵa, qoǵamdyq oryndarda maska taǵýǵa, áleýmettik qashyqtyq saqtaýǵa, sondaı-aq koronavırýsqa qarsy vaktsına alýǵa shaqyrady.

Eske salaıyq, naýryz aıynyń sońynan beri Shanhaıdyń birneshe aýdany lokdaýn engize bastady. Birinshi sáýirden bastap búkil megapolıs jabyldy.