Shámshi Qaldaıaqovtyń urpaqtary kompozıtordyń ánderinen qansha qalamaqy alyp júr

<p>ASTANA. KAZINFORM &ndash; Májiliste kreatıvti uıymdastyrýdy damytýǵa arnalǵan zań jobasy talqylanyp jatyr. Zań jobasyn ázirlep jatqan jumys tobynyń jetekshisi, depýtat Nartaı Sársenǵalıev avtorlyq qoǵamdardyń jumysyn synady.</p>

«Biz kreatorlardy tizimge qosyp alǵanymyzǵa mázbiz, biraq olardyń avtorlyq quqyǵyn qorǵaýǵa kelgende eshkim bas aýyrtqysy kelmeıdi. Qashanǵydaı ár kreator advokat jaldap, basqany jaldap, san soǵyp, sabylyp júrýge májbúr. Elimizde 15-16 avtorlyq qoǵam bar. Olardyń jumysyna qatysty da kóptegen syn bar. Avtorlyq qoǵamǵa adamnyń shyǵarmasyn qoldanǵany úshin túsetin aqshanyń 70 paıyzyn qoǵam ózi alyp qalady, 30 paıyzyn ǵana avtorǵa beredi», - dedi ol.

Nartaı Sársenǵalıev birneshe jyl buryn óziniń Muqaǵalı Maqataevtyń óleńine qalaı avtor atanǵanyn eske aldy.

«2010 jyly biz «Almaty» telearnasynda jýrnalıstik zertteý júrgizip, bir avtorlyq qoǵamnan 20 myń teńgege Jumeken Nájimedenov pen Muqaǵalı Maqataevtyń bir-bir óleńine avtor atanǵanbyz. Eshkim tekserip jatqan joq. Muqaǵalı men Jumekendi teksermegende, basqalardy tekseredi deý qate shyǵar.

Al Shámshi Qaldaıaqovtyń ánderin oryndaǵany úshin avtorlyq qoǵam kompozıtordyń urpaǵyna úsh aıda 18 myń teńge ǵana tólegen. Jalpy bul qazaqta Shámshiniń ánisiz ótken kesh bar ma? Ókinishke qaraı, bizdegi avtorlardyń quqyǵy qorǵalmaıtynyn osydan-aq kórýge bolady», - dedi depýtat. 

Ádilet mınıstrliginiń resmı málimeti boıynsha, 2023 jyly avtorlyq quqyq boıynsha 300-ge jýyq shaǵym túsken.