Shamalǵandaǵy apattan keıin jaıaý júrginshilerge arnalǵan kópiri ashyldy
Búgin oblys ákimi Amandyq Battalovtyń qatysýymen kópirdiń saltanatty ashylýy boldy.
«Búgin biz osy erekshe qurylys nysanyn paıdalanýǵa berip otyrmyz. Kópirdiń uzyndyǵy 59-60 metr bolsa, bıiktigi 9 metrge jetti. Egde adamdar men jas balalarǵa arnalǵan eki lıft ashyldy», - dedi ákim.
Onyń aıtýynsha, qurylysqa jergilikti bıýdjetten 365 mln teńge jumsalǵan. Qurylys nysany oblystyq turǵyn úı kommýnaldyq sharýashylyq menshigine beriledi.
Kópirdiń ashylýynda Jibek jol aýylynyń turǵyny Oksana Vıktorovna turǵyndar tarapynan rızashylyǵyn bildirdi.
«Kópir qurylysyn kóp kúttik. Jyl saıyn júretin poıyzdar sany artyp keledi. Balalarymdy mektepke jibergende ýaıymdaıtynmyn. Pandemııa kezinde de kópir qurylysy toqtamaǵany qýantady. Nysan ýaqytynda berildi. Oblys ákimine alǵysymdy bildiremin», - dedi ol.
Eske salsaq, 2019 jyly 15 qyrkúıekte Shamalǵan stantsııasynda relstiń ústinde turyp qalǵan jolaýshylar avtobýsymen jolaýshylar poıyzy soqtyǵysqan bolatyn.
Saldarynan avtobýs júrgizýshisi sol jerde mert bolyp, taǵy 3 adam Qarasaı aýdandyq aýrýhanasynyń jansaqtaý bólimine tústi.
Sot jazany taǵaıyndaý kezinde stantsııa kezekshisi Ahmedjanovtyń óz kinásin moıyndap, shyn ókinýin, onyń jasyn, otbasylyq jaǵdaıyn eskere otyryp, ony 3 jyl 6 aıǵa shartty túrde sottaǵan edi.
Osy oqıǵadan keıin Shamalǵan stantsııasynda estakada túrinde jol ótpesin salý sheshildi. Júrginshiler kópiriniń qurylysy da bastaldy.