Shalqar radıosyna 55 jyl toldy

NUR-SULTAN. QazAqparat - 1966 jyly 1 qańtarda Shalqar radıosy alǵash habar taratty. Sodan beri Shalqar radıosy eldegi tek memlekettik tilde habar taratatyn ultymyzdyń únjarııasyna aınaldy. Búginde ol quramynda «Qazaq», «Astana» jáne «Klassık» radıolary bar «Qazaq radıolary» JShS qatarynda kúndelikti tyńdarmandaryn aqjoltaı jańalyqtarymen qýantyp keledi.

Shalqar radıosynyń alǵashqy habar taratqan 1 qańtar kúngi efıri erekshe. Radıo ardagerleri men elimizdiń memleket jáne qoǵam qaıratkerleriniń quttyqtaýlary berilip, efırde ardagerler estelik-tilekterin aıtady.

Shalqar radıosy habarlarynyń basym bóligi 2020 jyldyń qyrkúıeginen bastap, Almaty qalasyndaǵy Jeltoqsan 175 meken jaıynan elimizdiń túkpir-túkpirine tolyq tikeleı efırde habar taratyp otyr. Qazirgi ýaqytta Shalqar radıosy 18 saǵat boıy eki shahar – Nur-Sultan men Almaty qalalarynan efırge shyǵýda.

Erekshe aıtarlyǵy, Shalqar radıosy ulttyq arna atyna saı 2020 jyldyń 1 qyrkúıek - jańa maýsymnan tek qana qazaqtyń ulttyq mýzykasy men tól ónerin, ulttyq mádenıeti men ádebıetin, babalar murasy - qazaqtyń áni men kúıin, saǵyndyrǵan retro mýzykasyn, ótkenimizden syr shertetin «Altyn qordaǵy» asyl qazynalaryn nasıhattaýǵa túbegeıli bet burdy. Al arnaıy estradalyq mýzykaǵa arnalǵan baǵdarlamalarda ǵana estradaǵa óńdelgen halyq ánderi men qazaqy sıpattaǵy estradalyq ánder berilýde. Radıo formatyna saı ımıdjdik rolıkteri, «tósenish» mýzyka (podlojka) t.b. ulttyq baǵytta jańalandy.

Shalqar radıosy «Altyn qordaǵy» injý-marjandarymyzdy aptanyń bes kúninde saǵat 22.00-de bir saǵattan kúndelikti úzbeı berip keledi. Sondaı-aq «Altyn qordaǵy tulǵalar daýysy», «Altyn qordan án tyńdaıyq», «Altyn qordan kúı tyńdaıyq», «Bizge qymbat daýystar» syndy arnaıy aıdarlar kúnine birneshe dúrkin efırden ótedi. «Retro» aıdarynda kún saıyn «Altyn qordan» basqa esh jerde kezdespeıtin orıgınal jazbalar berilip keledi.