Shalǵaı aýyldaǵy stýdentter sessııany qalaı tapsyrady – vıtse-mınıstr jaýaby

NUR-SULTAN. QazAqparat – Internet júıesiniń durys bolmaýyna baılanysty sessııa tapsyrmaı qoıýǵa nemese ýaqytyn shegerýge bolmaıdy. Bul týraly Ortalyq kommýnıkatsııalar qyzmetinde ótken onlaın brıfıngte QR Bilim jáne ǵylym vıtse-mınıstri Mıras Dáýlenov aıtty, dep habarlaıdy QazAqparat tilshisi.

«Interneti joq aýylda turatyn nemese kompıýteri joq stýdentterge jataqhanada jatyp oqýǵa bolatyny týraly aqparat aldyn ala aıtylǵan bolatyn. Qazirgi ýaqytta barlyq JOO-daǵy jataqhanalar shtattyq rejımde jumys isteıdi. Semestrdiń basynda jataqhanalarda 15 myńǵa jýyq stýdent jatsa, qazirgi kezde 7 myń stýdent turyp jatyr. Bul – ınterneti joq, shalǵaı aýylda turatyn stýdentter», - deıdi QR Bilim jáne ǵylym vıtse-mınıstri Mıras Dáýlenov.

Sondaı-aq, ol ınternet júıesiniń durys bolmaýyna baılanysty sessııa tapsyrmaı qoıýǵa nemese ýaqytyn shegerýge bolmaıtynyn aıtty.

«Internetke qatysty másele bolsa jataqhanada jatyp oqýǵa bolatynyn aldyn ala eskertkenbiz, sondyqtan ony syltaý etip sessııany keıinge shegerýge bolmaıdy. Qashyqtan oqıtyn stýdentter úshin sessııa da qashyqtan ótedi. Kóptegen emtıhan antıplagıat júıesin qoldana otyryp júzege asady. Sońǵy 5 jylda joǵary oqý oryndary antıplagıatqa qatysty ártúrli júıelerdi qoldanyp keledi, sondyqtan bul stýdentter úshin jańalyq emes», - deıdi ol.