Shahtınskidegi apattan qaza tapqan 5 kenshiniń otbasyna páter beriledi

QARAǴANDY. QazAqparat – Búgin túnde Shahtınskidegi apattan qaıtys bolǵan 5 kenshiniń otbasyna qosymsha páter beriledi. Bul týraly Qaraǵandy oblysynyń ákimi Jeńis Qasymbek óńirlik kommýnıkatsııalar qyzmetinde ótip jatqan brıfıngide aıtty, dep habarlaıdy QazAqparat tilshisi.

«Qaıtys bolǵan kenshilerdiń otbasymen tıisti medıtsınalyq jáne ózge de mekemelerdiń pıshologtary jumys istep jatyr. Ákimdik tarapynan ol otbasylarǵa qajetti kómektiń bári kórsetiledi. Odan bólek, ujymdyq eńbek shartyna sáıkes, bul otbasylarǵa shahterlerdiń 10 jyldyq eńbekaqysy kóleminde materıaldyq kómek kórsetiledi», - dedi Jeńis Qasymbek.

Aıtýynsha ujymdyq shartta budan basqa da ótemaqylar qarastyrylǵan.

«Sondaı-aq, ujymdyq shart boıynsha ol otbasylarǵa nesıesin jabý, balalaryn oqytý sekildi kómek túrleri bar. Sonymen birge bıyldan bastap ujymdyq shartta zardap shekkenderdiń otbasylaryna qosymsha baspana alyp berý sharasy engizilgen. Árbir otbasyǵa qosymsha páter alynady», - dedi oblys ákimi.

Esterińizge sala keteıik, búgin túnde «ArselorMıttal Temirtaý» AQ kómir departamentiniń Lenın atyndaǵy shahtasynda apat bolyp, saldarynan 5 kenshi qaza tapty.

TJ faktisi boıynsha QR QK 277-babynyń 3-bóligi boıynsha qylmystyq is qozǵaldy.

Qaraǵandy oblysynyń ákimdigi Lenın atyndaǵy shahtada qaza bolǵandardyń tizimin jarııalady.