Shahtınskide polıtsııany aspanǵa oq atýǵa májbúr etken buzaqylar tergelip jatyr

ShAHTINSK. QazAqparat – Shahtınskide polıtseıler tóbelesti toqtatý úshin aspanǵa oq atýǵa májbúr boldy, buzaqylar túgeldeı bólimshege jetkizildi, dep habarlaıdy QazAqparat polisia.kz telegram kanalyna silteme jasap.

22 naýryz kúni saǵat 23:50 shamasynda Shahtınsk polıtsııa bóliminiń kezekshi bólimine qaladaǵy túngi kóńil kóteretin oryndardyń biriniń mańynda kıkiljiń bolyp jatqany týraly habarlama túsken. Oqıǵa ornyna tez arada sol mańǵa jaqyn patrýldik polıtsııa jasaǵy jiberiledi.

«Belgisiz adamdardyń qatysýymen tóbeles bolyp jatqany anyqtaldy. Quqyqqa qaıshy áreketterdi jáne aýyr zardaptardy boldyrmaý maqsatynda polıtsııa qyzmetkerleriniń biri aspanǵa eskertý retinde oq atty. Oqıǵaǵa qatysýshylardyń barlyǵy polıtsııa bólimine jetkizildi», - dedi polıtsııadan.

Atalǵan derek boıynsha QR QK-niń 293-baby 2-bóligine («Buzaqylyq») sáıkes qylmystyq is qozǵaldy. Tergeý amaldary júrgizilip jatyr.