Shahtınskide ımamdar boz kilemde beldesti

ShAHTINSK. QazAqparat – Qaraǵandy oblysynyń Shahtınsk qalasynda qazaq kúresinen «Imamdar barysy» týrnıri ótti, dep habarlaıdy QazAqparat.

«Bul jarystyń basty maqsaty – buqaralyq sportty damytý. Óskeleń urpaq úshin de úlgi. Bul óte qajet», - deıdi Shahtınsk qalasynyń ákimi Murat Qydyrǵanbekov.

Shahtınskidegi oblystyq týrnırge óńirdiń ımamdary qatysty. Qazaq kúresinen jarystar buǵan deıin birneshe ret ótkizilgen. Alaıda din ókilderi men teologtar arasynda tuńǵysh uıymdastyrylyp otyr. Jarys shartyna sáıkes, oǵan Qazaqstan musylmandary dinı basqarmasy bólimsheleriniń ókilderi ǵana qatysa alady.

«Búgingi kúni ımamdar qoǵammen jaqyn bolýy úshin rýhanı qundylyqtardan bólek, sportty da nasıhattaýy qajet. Biz kópke úlgi bolýymyz kerek», - dep qosty Qaraǵandy oblysynyń bas ımamy Estaı Aıtýǵanuly.

Jarysqa 70 – 90 kelige deıingi salmaqtaǵy 37 din ókili qatysty. Palýandar jupqa bólinip kúresti. Júzden júırik shyqqandar ózara myqtyny anyqtady.

Nátıjesinde, 90 keli salmaq dárejesinde Áset Naýryzbaıuly 1-oryn alyp, 100 myń teńgeniń sertıfıkatyna qol jetkizdi. Al 70 keli salmaq dárejesinde Qaraqaraly aýdanynyń Jańatoǵan aýylynan Qanat Muhammed jeńiske jetip, dál osyndaı kólemde aqshalaı syılyq aldy.