Shahtınsk turǵyny 40 jasynda alǵash ret jeke kýálik aldy

<p>ASTANA. KAZINFORM — Jańa jyl qarsańynda Shahtınsk qalasynyń polıtsııa bóliminiń kóshi-qon qyzmeti qala turǵynyna erekshe syı jasady. 40 jastaǵy er adam ómirinde alǵash ret jeke kýálik aldy.</p>

Bul oqıǵa onyń otbasy úshin de mańyzdy ári qýanyshty sátke aınaldy.

Qaraǵandy oblysynda kóshi-qon qyzmeti quqyqtyq mártebesi anyqtalmaǵan azamattardyń máselelerin sheshý baǵytynda belsendi jumys istep keledi. Bul jumys halyqty esepke alý, kóshi-qon baqylaýyn jaqsartý jáne azamattardy áleýmettik ıntegratsııalaý turǵysynan mańyzdy ról atqarady. 

2024 jyly qyzmet aıtarlyqtaı nátıjelerge qol jetkizdi: qaraýǵa usynylǵan 22 istiń ishinen 14 adam Qazaqstan Respýblıkasynyń azamattyǵyn alyp, qujattandyryldy. Bul kórsetkish qyzmetkerlerdiń joǵary kásibıligin jáne tabandylyǵyn dáleldeıdi. Olar aqparattyń jetispeýshiligi, qarjylyq qıyndyqtar men túrli kedergilerdi jeńýge kómek berip, azamattardy qoldap keledi.

— Ásirese, Shahtınsk turǵynynyń uzaq jyldar boıy qujatsyz ómir súrgen jaǵdaıy erekshe nazar aýdarady. Polıtsııa qyzmetkerleri barlyq qajetti qujatty jınap, rásimderdi zańdy túrde aıaqtaýǵa kómektesken. Nátıjesinde er adam alǵash ret jeke kýálikke qol jetkizip, zańdy jumysqa ornalasý, áleýmettik ómirge aralasý sııaqty jańa múmkindikterge ıe boldy. Shahtınsk turǵynynyń oqıǵasy ishki ister organdary qyzmetkerleriniń kásibıligi men adamgershiliginiń aıqyn dáleli sanalady, — delingen Kóshi-qon qyzmetiniń habarlamasynda.

Buǵan deıin Aqtóbede kóshi-qon zańnamasyn buzǵan 400-den astam sheteldik elden shyǵarylǵanyn habarlaǵan edik.