Shahtınsk qalasy mańynda ekpe orman órtendi
Jalyn 500 sharshy metr aýmaqqa jaıyldy, orman alqabyn sharpyǵan otpen kúreske 16 adam jáne 4 arnaıy tehnıka jumyldyryldy, dep habarlaıdy QazAqparat tilshisi.
1 shildede saǵat 15:49-da Shahtınsk qalasynyń «Qaraǵandy orman jáne janýarlar dúnıesin qorǵaý sharýashylyǵy» KMM aýmaǵynda orman alqabynda órt týraly habarlama kelip tústi.
Orman alqabynyń aýmaǵynda 100 sharshy metr alańda aǵashtar men butalar jáne 400 sharshy metr alańda shóp órtendi.
«Tilsiz jaý 16 saǵat 23 mınýtta aýyzdyqtaldy. Órtti sóndirýge TJ departamentiniń (9 adam jáne 2 tehnıka) jáne Qaraǵandy orman sharýashylyǵynyń ormandar men janýarlar dúnıesin qorǵaý jónindegi kúshteri men quraldary (7 adam jáne 2 birlik tehnıka) tartyldy. Qaza bolǵandar men zardap shekkender joq. Órttiń shyǵý sebebi anyqtalýda», - dep habarlady Qaraǵandy oblysy TJD baspasóz qyzmeti.
Qaraǵandy oblysynda aýa raıynyń ystyq bolýyna baılanysty órt qaýpi joǵarylady. Bıyl 12 sáýir men 31 qazan aralyǵynda óńirdegi memlekettik orman qory aýmaǵynda toǵyz orman órti boldy.
Tabıǵı resýrstar jáne tabıǵat paıdalanýdy retteý basqarmasy oblys turǵyndaryn tabıǵatty qorǵaýǵa jáne ormanda órt qaýipsizdigi erejelerin saqtaýǵa shaqyrady.