«Shahter» fýtbol klýbyn chehııalyq maman Irjı ıAroshık jattyqtyratyn boldy

<p>ASTANA. KAZINFORM &ndash; Bıyl premer-lıgamen qoshtasqan &laquo;Shahter&raquo; fýtbol klýbynyń dırektorlar keńesiniń kezekten tys otyrysy ótkizildi.</p>

Klýbtyń baspasóz qyzmetinen alynǵan málimetke qaraǵanda, buǵan deıin oblys ákimi Ermaǵanbet Bólekpaev klýb basshylyǵyn synǵa alyp, komandany qazirgi daǵdarystan alyp shyǵýdyń jolyn tabýdy tapsyrǵan.

Dırektorlar keńesiniń sheshimimen klýbtyń jańa atqarýshy dırektory taǵaıyndaldy, ol – Talǵat Dúısekov, tabysty kásipker, qoǵam qaıratkeri jáne metsenat. Sport menedjmenti salasynda belgili bir tájirıbesi bar. 2022-2023 jyldary ol Ulttyq sport túrleri qaýymdastyǵyna kiretin Asyq atý federatsııasyn basqarǵan. Az ýaqytta uıymnyń qurylymyn jańartyp, tuńǵysh ret asyq atýdan Azııa chempıonatyn ótkizgen.

Onyń basty mindeti – «Shahterdi» tyǵyryqtan shyǵaryp, klýb jumysyn qaıta qurý, tyń kúsh berip, áleýetin kúsheıtý. Oblys ákiminiń tapsyrmalaryn eskere otyryp, bir aıdyń ishinde klýbtyń damý strategııasyn daıyndaý.

Budan bólek, klýbtyń jańa basshylyǵyna balalar men jasóspirimder fýtbolyn damytý mindeti júkteldi. Osyǵan oraı, qalalar men aýdandarda «Shahter» akademııasynyń fılıaldary ashylady. Kelesi jyly jasóspirimder men jastar komandalary arasynda fýtbol týrınıri ótedi, onyń nátıjesi boıynsha jas daryndar akademııada oqýǵa irikteletin bolady.

Qazirdiń ózinde klýbtyń jańa basshylyǵy bapkerlik shtabqa sheteldik mamandardy tartý boıynsha kelisimder jasaǵan. Búgin belgili bolǵandaı, negizgi komandany jańa maýsymǵa cheh jattyqtyrýshysy Irjı ıAroshık daıyndaıdy.

Irjı ıAroshık – kásibı fýtbolshy, ol Anglııanyń («Chelsı» quramynda), Shotlandııanyń («Seltık»), Chehııanyń («Sparta») jáne Reseıdiń (TsSKA) chempıony bolǵan. Ispanııa Prımerasynda óner kórsetken («Saragosa» men «Alaves» sapynda). Eýropanyń joǵary dıvızıondyq chempıonattarynda kásibı klýbtardy jattyqtyrýǵa quqyq beretin UEFA PRO lıtsenzııasy bar. «Shahterǵa» kelgenge deıin Chehııa, Slovakııa, Slovenııa men Reseı klýbtarynda jattyqtyrýshy bolǵan.

Jattyqtyrýshy mindetimen qatar ıAroshık qaraǵandylyq fýtbol mamandarynyń kásibıligin kóterýmen aınalysady.

«Shahter» komandasy óz tarıhynda alǵash ret bıyl birinshi lıgaǵa túsip qaldy.

Eske sala keteıik, budan buryn «Aqtóbeniń» úzdik úshtikke taban tiregenin jazǵan bolatynbyz.