Shahtadaǵy tekserý, kinálilerdi jazalaý sharalary halyqqa jarııalanýy kerek - Elvıra Ázimova

ASTANA. QazAqparat - Adam quqyqtary jónindegi ýákil Elvıra Ázimova «ArselorMıttal Temırtaý» AQ shahtasynda qaza tapqandardyń týystaryna kóńil aıtyp, oqıǵaǵa pikir bildirdi, dep habarlaıdy QazAqparat.

«Búgin Shahtınsk qalasyndaǵy shahtadaǵy qaıǵyly oqıǵadan 5 adamnyń ómiri qıyldy. Qaza tapqandardyń jaqyndaryna kóńil aıtamyn jáne apat saldarynan zardap shekken barlyq azamattardyń tezirek saýyǵyp ketýin tileımin. Ótken aptada men eki kezdesý ótkizdim, sol kezdesýge qatysqan azamattar shahtaǵa túsken kezdegi ózderiniń jeke áserin bólisip, jumys berýshiniń qaýipsizdik jáne áleýmettik qorǵaý turǵysynan mindettemelerin oryndaýyn qatań baqylaýǵa alý qajettigi týraly pikir bildirgen bolatyn. Búgin de jýrnalıst osyndaı pikir aıtyp, kináli adamdardy jaýapqa tartý týraly suraq qoıdy», - dep jazdy Elvıra Ázimova Facebook paraqshasynda.

Onyń aıtýynsha, bul - «ArselorMıttal Temirtaý» AQ-nyń shahtalarynda bolǵan birinshi oqys oqıǵa emes ekeni bárimizge málim.

Memleket basshysy búgin Úkimetke apattyń sebepterin anyqtaý boıynsha jedel sharalar qabyldaýdy jáne qaza tapqandar men zardap shekkenderdiń otbasylaryna tıisti kómek kórsetýdi tapsyrǵan.

«Jeti shahta bir táýlikke jumysyn toqtatty. Adamdar qaıtys bolǵan segizinshi shahtada jumys toqtatylyp, tekserý júrip jatyr. Bul tekserýler jan-jaqty, komıssııalyq túrde uıymdastyrylýy tıis, sondaı-aq qaýipsizdikti kúsheıtý jáne kinálilerdi jaýapqa tartý boıynsha nátıjeler men qabyldanatyn sharalar halyqqa jarııalanýy kerek»,-deıdi ombýdsmen.

Esterińizge sala keteıik, búgin túnde «ArselorMıttal Temirtaý» AQ kómir departamentiniń Lenın atyndaǵy shahtasynda apat bolyp, saldarynan 5 kenshi qaza tapty.

TJ faktisi boıynsha QR QK 277-babynyń 3-bóligi boıynsha qylmystyq is qozǵaldy.

Qaraǵandy oblysynyń ákimdigi Lenın atyndaǵy shahtada qaza bolǵandardyń tizimin jarııalady.