Shahmatshy Dınara Sádýaqasovaǵa «Qurmet» ordeni tapsyryldy
Oǵan qurmetti nagradany Aqordada QR Memlekettik hatshysy Gúlshara Ábdiqalyqova tapsyrdy.
«Tamasha sezimge bólenip otyrmyn, álem birinshilikterindegi nátıjeler, Qazaqstanda shahmatty damytý men nasıhattaýǵa qosqan úlesim laıyqty baǵalanǵanyna óte qýanyshtymyn. Osy rette Prezıdentimiz Nursultan Ábishulyna sportqa únemi qoldaý jasap otyrǵany úshin alǵysymdy aıtamyn. Barsha Qazaqstan halqyn Táýelsizdiktiń 25 jyldyǵymen quttyqtaımyn»,-dedi ol «QazAqparat» tilshisine bergen suhbatynda.
Álem moıyndaǵan shahmatshy aldyna úlken maqsattardy qoıyp otyrǵanyn jáne oǵan qol jetkizý úshin barlyq kúsh-jigerin salatynyn atap ótti.
«2012 jyly men alǵash ret el Prezıdentimen kezdesken bolatynmyn. Sol kezde birneshe márte álem chempıony bolatynyma ýáde bergen edim. Men ózimniń ýádemdi oryndadym. Qazirgi kezde de aldyma úlken mindetterdi júktep otyrmyn. Endi áıelder arasynda álem chempıony bolǵym keledi. Bul meniń maqsatym men armanym»,-dedi D. Sádýaqasova.
Aıta keteıik, D. Sádýaqasova 14 jasqa deıingi qyzdar arasynda álem chempıony (2010 jyl), 18 jasqa deıingi qyzdar arasyndaǵy álem chempıony (2014 jyl), 20 jasqa deıingi qyzdar arasyndaǵy álem birinshiliginde chempıon (2016 jyl) atandy.