Shahmat páninen qaı muǵalimder jattyqtyrýshy bola alady

ASTANA. QazAqparat – Elimizde bastaýysh synyptarda shahmat oıyny fakýltatıv pán retinde engizilmek. Osy oraıda, bar kadrlardyń biliktiligin kóterý jáne jańa mamandar daıarlaý máselesi qarastyrylyp jatyr. Tolyǵyraq Qazaqstan shahmat federatsııasynyń birinshi vıtse-prezıdenti Dármen Sádýaqasov aıtyp berdi, dep habarlaıdy QazAqparat tilshisi.

«Oqý-aǵartý, ǵylym jáne joǵarǵy bilim, mádenıet jáne sport mınıstrlikterimen birlesip, kadr, ıaǵnı jattyqtyrýshy jáne pedagogter daıarlaý máselesin talqyladyq. Aldymen, shahmat jattyqtyrýshylarynyń biliktiligin arttyrý máselesi tur. Taǵy bir aıta ketetin jaıt, bastaýysh jáne basqa da pánder muǵalimderi arnaıy kýrstan ótip, shahmat jattyqtyrýshysy bola alady. Sonymen qatar, pedagogıkalyq joǵary oqý oryndarynda shahmat páni muǵalimderin daıarlaý máselesi qaraldy. Shahmat metodologııasy, oqý baǵdarlamasy jáne oqý-metodıkalyq kesheni boıynsha jańa kadrlar daıarlaý sóz bolyp otyr», - dedi Dármen Sádýaqasov ortalyq kommýnıkatsııalar alańynda ótken baspasóz máslıhatynda.

Sondaı-aq, spıker shahmat boıynsha oqýlyq, jumys dápteri jáne metodıkalyq ádisteme ázirleý josparlanyp jatqanyn tilge tıek etti.

«Búginde atalǵan baǵyttaǵy jumys halyqaralyq sarapshylardyń qatysýymen júrgizilip jatyr. Shahmatty bastaýysh synyptarda fakýltatıv pán retinde engizýdi belgili bir óńirlerden bastaımyz. Joba oń nátıje berse, ony engizý aıasyn keńeıte túsemiz», - deıdi ol.

Buǵan deıin habarlaǵanymyzdaı, shahmat 1-4 synyp oqýshylary arasynda fakýltatıv pán retinde engizilmek.