Shahmat Olımpıadasynda qazaqstandyqtar kezekti jeńisine jetti

NUR-SULTAN. QazAqparat - Úndistannyń Chennaı qalasynda ótip jatqan Shahmat Olımpıadasynda elimizdiń erler jáne áıelder quramasy jetinshi oıynyn ótkizdi, dep habarlaıdy QazAqparat tilshisi.

Elimizdiń erler quramasy 5 tamyzda Ispanııadan 2,5:1,5 esebimen basym tústi. Olardyń qatarynan Rınat Jumabaev, Arystanbek Orazaev, Qazybek Nógerbek teń tússe, Álisher Súleımenov jeńiske jetti.

Erler quramasy buǵan deıin Lıvan men Latvııany 4:0, Qytaı Taıbeıin 3:1, Marokko men Chehııany 2,5:1,5 esebimen jeńip, Tájikstanǵa 1,5:2,5 esebimen ese jibergen-di .

Dál osyndaı eseppen elimizidń áıelder quramasy Vetnamdy jeńdi. Qurama sapynan Jansaıa Ábdimálik qarsylasynan basym tússe, Bıbisara Asaýbaeva, Gúlishan Nahbaeva men Nazerke Nurǵalı teń nátıjege qanaǵat bildirdi.

Al, áıelder quramasy ótken týrda Ázerbaıjanǵa 1:3 esebimen jol berip qoıdy. Olar buǵan deıin Perý, Kýba men Belgııany 3:1, Gvatemalany 4:0 jeńip, Mońǵolııamen 2:2 esebimen teń tústi.