Shahmat Olımpıadasynda elimizdiń erler quramasy jeńiske jetti

NUR-SULTAN. QazAqparat - Úndistannyń Chennaı qalasynda ótip jatqan shahmat Olımpıadasynda elimizdiń erler quramasy jetinshi jeńisine qol jetkizdi, dep habarlaıdy QazAqparat tilshisi.

Qazaqstandyq shahmatshylar Horvatııany 3:1 esebimen súrindirdi. Qurama sapynan Álisher Súleımenov jáne Arystanbek Orazaev jeńiske jetse, Rınat Jumabaev pen Qazybek Nógerbek teń nátıjege qanaǵat bildirdi.

Osylaısha el quramasy Olımpıadada jeti márte jeńiske qol jetkizip, úsh márte qarsylastaryna ese jiberdi.

Erler quramasy buǵan deıin Lıvan men Latvııany 4:0, Qytaı Taıbeıin 3:1, Marokko, Chehııa, Ispanııany 2,5:1,5 esebimen jeńip, Tájikstan, Ázerbaıjanǵa 1,5:2,5, Serbııaǵa 1:3 esebimen ese jibergen-di.

Nátıjesinde Olımpıada reıtınginde 25-orynnan 20-orynǵa kóterildi. Alǵashqy eki orynda Ózbekstan jáne Armenııa quramalary keledi.

Eske salsaq, búgin elimizdiń qyzdar quramasy Úndistannan jeńilip qalǵanyn jazǵan edik.