Shahmat festıvali: ár sportshy 15 qatysýshymen bir ýaqytta oınady
Bir mezgildegi oıyn seansy – jarystyń áserli jáne qyzyqty formaty. Bir myqty shahmatshy ártúrli taqtada tómengi deńgeıdegi birneshe qarsylaspen oınaıdy. Uıymdastyrýshylar bul formatty festıval baǵdarlamasyna mindetti túrde engizgen.
«Bul sessııalar balalar men jańadan bastaǵan shahmatshylarǵa shahmatty úırenýge, jattyǵýǵa, motıvatsııa alýǵa jáne shabyttanýǵa biregeı múmkindik beredi. Grossmeıstermen partııa qatysýshylardy oıynmen joǵary deńgeıde tanystyrady. Sonymen qatar, mundaı formattar keń aýdıtorııada shahmatqa degen qyzyǵýshylyqty oıatady», - deıdi sportshy Dınara Sádýaqasova.
13 shildede nıet bildirýshilermen qazaqstandyq grossmeıster, Azııa oıyndarynyń chempıony, shahmattan erler arasynda Qazaqstannyń úsh dúrkin chempıony Murtas Qajgaleev pen áıgili ýkraınalyq grossmeıster Vıtalıı Bernadskıı oınady.
Sportshylardyń árqaısysy 15 qatysýshymen bir ýaqytta oınady, olardyń arasynda ártúrli daıyndyq deńgeıindegi shahmatshylar da boldy.
«Shahmat – bizge árqashan qýanysh pen kúshti emotsııa syılaıtyn ǵajaıyp óner. Men jas qarsylastarymmen sóılesip, seansty tek jarys retinde ǵana emes, sonymen qatar tájirıbe retinde qabyldaý kerektigin aıttym. Oıyndardyń nátıjelerine qaramastan, oqýdy jalǵastyrý jáne jetildirý mańyzdy. Árbir oıyn bolashaqta qoldanýǵa bolatyn qundy sabaq pen tájirıbe ákeledi», - deıdi Murtas Qajǵaleev.
Al, 14 shildede qatysýshylarmen Dınara Sádýaqasova jáne belarýs grossmeısteri Vladıslav Kovalev oınaıdy.
Eske salaıyq, «Astana juldyzdary» halyqaralyq shahmat festıvali álemniń 16 elinen 800-den astam oıynshynyń basyn qosty. Tirkelýshilerdiń edáýir bóligi – balalar.
Týrnırlerdiń júlde qory – 40 mıllıon teńge, bul – rekordtyq soma. Osy qarajat aıasyndaǵy arnaıy júldeler balalar, áıelder men shahmat ardagerlerine de qarastyrylǵan.
Buǵan deıin habarlaǵanymyzdaı, 11-19 shildede elordanyń 25 jyldyǵyna oraı «Astana juldyzdary» halyqaralyq shahmat festıvali ótip jatyr.
«Astana juldyzdarynyń» ereksheligi men mańyzy – «FIDE uıymdastyrýshysy» ataǵyna arnalǵan semınar. Mundaı is-shara Qazaqstanda alǵash ret ótkizilip otyr.