Shaǵyn jylý qazandyqtaryna jaýapkershilikti jergilikti ákimdikterge júkteý usynyldy

ASTANA. QazAqparat – Energetıka vıtse-mınıstri Jandos Nurmaǵanbetov elimizdegi shaǵyn jylý qazandyqtarynyń jumysyn qadaǵalaýdyń qıynǵa soǵyp otyrǵanyn málimdedi, dep habarlaıdy QazAqparat tilshisi.

«Іri qalalardaǵy úlken jylý qazandyqtaryn biz qadaǵalap otyrmyz. Búginde Astanada JEO-3 jáne Arqalyq qalasynda jylý qazandyǵy salynyp jatyr. Іri jylý qazandyqtarynyń túpki jaǵdaıy bizge tanys. Osy oraıda qarjylandyrý jaǵy bir memlekettik organǵa júktelse, durys bolar edi dep esepteımiz. Óıtkeni, keıbir jylý qazandyqtary bizden aqsha surasa, keıbiri Indýstrııa mınıstrliginen surap jatady», – dedi Jandos Nurmaǵanbetov Parlament Senaty qarjy jáne bıýdjet komıtetiniń otyrysynda.

Sondaı-aq, vıtse-mınıstr elimizdegi iri jylý qazandyqtaryn mınıstrliktiń quzyretinde qaldyryp, al shaǵyn jylý qazandyqtarynyń qyzmetin jergilikti atqarýshy organdardyń jaýapkershiligine júkteýdi usyndy.

«Óıtkeni elimizde 2 myńnan astam shaǵyn jylý qazandyqtary bar, al bizdiń mınıstrlikke qarasty komıtette bar-joǵy úsh adam. Olar búkil óńirdegi aýdan-aýyldarǵa baryp shaǵyn jylý qazandyqtarynyń jaǵdaıyn tekserip, qadaǵalaı almaıdy. Negizi bul máseleni Indýstrııa jáne ınfraqurylymdyq damý mınıstrligi baqylaýda ustaıdy, biraq olar jergilikti ákimdik bergen aqparatqa súıenedi. Osy oraıda shaǵyn jylý qazandyqtarynyń jaǵdaıyn qadaǵalaý tolyqtaı jergilikti atqarýshy organdardyń moınyna júktelse degen usynysymyz bar», - deıdi ol.