Shaǵyn jáne orta bızneske jylyna 8 paıyzben jeńildetilgen nesıe beriledi - Ulttyq bank
Koronovırýstyq ınfektsııa pandemııasyna jáne onyń Qazaqstan ekonomıkasyna teris yqpalyna baılanysty tótenshe jaǵdaı nátıjesinde zardap shekken shaǵyn jáne orta kásipkerlik sýbektilerin, dara kásipkerlerdi qoldaýǵa arnalǵan Qazaqstan Prezıdenti Q.K. Toqaevtyń tapsyrmasy boıynsha Ulttyq bank Qarjy naryǵyn retteý jáne damytý agenttigimen birlesip Shaǵyn jáne orta kásipkerlik sýbektilerin jeńildikpen kredıtteý baǵdarlamasyn ázirledi.
Atalǵan baǵdarlamany iske asyrý úshin ekinshi deńgeıdegi bankterde negizdelgen salymdardy ornalastyrý arqyly 600 mlrd teńge bólindi. Bıznesti qoldaý tetigi ekinshi deńgeıdegi bankterdiń tótenshe jaǵdaıdyń engizilýi nátıjesinde zardap shekken shaǵyn jáne orta kásipkerlik sýbektilerine, dara kásipkerlerge 12 aıǵa deıingi merzimmen jyldyq 8%-dan aspaıtyn mólsherleme boıynsha aınalym qarajatyn tolyqtyrýǵa jeńildikpen kredıtter berýi arqyly iske asyrylady. Ekinshi deńgeıdegi bankterdiń qarajatty ıgerý merzimi - 3 aı.
«Jeńildikpen kredıtteý baǵdarlamasynyń operatory - Ulttyq bank janyndaǵy «Qazaqstannyń ornyqtylyq qory» AQ. Sondaı-aq aktıvter sapasyn táýelsiz baǵalaýdan (Asset Quality Reviews) ótken jáne portfelinde shaǵyn jáne orta kásipkerlik sýbektilerine berilgen qaryzdary bar 13 qatysýshy bank belgilendi. Baǵdarlamaǵa qatysýshy bankterdiń bólingen qarajatty memlekettik jáne memlekettik emes baǵaly qaǵazdardy satyp alýǵa, basqa bankterdegi depozıtterge ornalastyrýǵa, shetel valıýtasyn satyp alýǵa paıdalanýyna jáne ózge maqsatqa saı paıdalanbaýyna tyıym salynady» delingen Ulttyq bank taratqan habarlamada.
Qazaqstan Respýblıkasy Qarjy naryǵyn retteý jáne damytý agenttigi «Qazaqstannyń ornyqtylyq qory» AQ-pen birlesip kásipkerlerge berilgen jeńildikti kredıtterdiń ýaqtyly jáne nysanaly paıdalanylýyna aı saıynǵy negizde monıtorıng júrgizetin bolady.
Qazaqstan Respýblıkasynyń Ulttyq Banki bólingen qarajattyń sońǵy qaryz alýshyǵa jetkizilýi boıynsha barlyq qajetti sharalardy qabyldaıtyn bolady.