Shaǵyn jáne orta bıznes sýbektilerine qoldaý kórsetý jalǵasýda – Mádına Ábilqasymova

NUR-SULTAN. QazAqparat – Shaǵyn jáne orta bıznes sýbektilerine kredıt tólemin jeńildetilgen tártippen keıinge qaldyrý ne ony qaıta qurylymdaý túrinde qoldaý kórsetilip otyr. Bul týraly Úkimet otyrysynda Qarjy naryǵyn retteý jáne damytý agenttiginiń tóraıymy Mádına Ábilqasymova aıtty, dep habarlaıdy QazAqparat tilshisi.

«Memleket basshysy ekonomıkanyń zardap shekken sektorlarynda shaǵyn jáne orta bıznestiń barlyq qoldanystaǵy kredıtteri boıynsha paıyzdyq stavkalardy jyldyq 6 paıyzǵa deıin memlekettik sýbsıdııalaý arqyly shaǵyn jáne orta bıznes sýbektilerine qosymsha kómek kórsetýdi tapsyrdy. Ekonomıkadaǵy daǵdarysty jaǵdaılarda agenttiktiń basym mindeti – atalǵan sýbektilerdi qarjylandyrýǵa qoldaý kórsetý jáne kredıttik resýrstarǵa qoljetimdiliktiń tómendeýine jol bermeý. Shaǵyn jáne orta bıznes sýbektileriniń qarjylyq ornyqtylyǵy jáne tólem qabilettiligi qarjy uıymdarynyń turaqtylyǵyn qamtamasyz etý úshin mańyzdy. Memleket basshysynyń tapsyrmasy boıynsha tótenshe jaǵdaı kezeńinde bul sýbektilerdiń kredıtter jáne mıkrokredıtter boıynsha tólemder merzimi keıinge qaldyryldy. Osy jylǵy 16 naýryz ben 15 maýsym aralyǵynda 12 455 sýbektiniń tólem merzimi keıinge qaldyryldy, bul kredıt alýshy sýbektilerdiń jalpy sanynan 41,5 paıyzdy quraıdy. Kredıtter boıynsha merzimi keıinge qaldyrylǵan tólemder somasy 164,8 mlrd teńge boldy», - deıdi ol.

Agenttik tóraıymynyń atap ótýinshe, qazirgi ýaqytta shaǵyn jáne orta bıznes sýbektilerine kredıtter boıynsha tólemderdi jeńildetilgen tártippen keıinge qaldyrý ne olardy qaıta qurylymdaý túrinde qoldaý kórsetý jalǵasýda.

Osy jylǵy 16 maýsym men 1 qyrkúıek aralyǵynda 25 mlrd teńge somaǵa 3,3 myńnan joǵary kredıt boıynsha merzimin keıinge qaldyrý maquldandy, 669 kredıt alýshynyń kredıtteri qaıta qarjylandyryldy.

«Osy jylǵy 1 shildede shamamen 30 myń sýbektiniń 3,9 trln teńge somaǵa ekinshi deńgeıdegi bankte kredıtteri bar. Onyń ishinde 11 myńǵa jýyq sýbekt kásipkerlikti qoldaýdyń memlekettik baǵdarlamalarynyń jeńildik talaptarymen kredıtter aldy. Sonymen qatar, shaǵyn jáne orta bıznes sýbektilerin jeńildikpen kredıtteý baǵdarlamasy aıasynda aınalym kapıtalyn tolyqtyrýǵa 387 mlrd teńge somaǵa 3 308 kredıt berildi. Qalǵan kredıt alýshylar «Qarapaıym zattar ekonomıkasy» jáne «Bıznestiń jol kartasy-2025» baǵdarlamalarymen qamtylǵan», - deıdi Mádına Ábilqasymova.