Shaǵyn nesıelendirý: Ózin-ózi jumyspen qamtyp júrgender úshin bir shekteý bolady
QR Ulttyq ekonomıka mınıstrliginiń kásipkerlikti damytý departamenti basshysynyń orynbasary Shyńǵys Axmetovtyń aıtýynsha, barlyq aqsha "Nátıjeli jumyspen qamtý jáne jappaı kásipkerlikti damytý" memlekettik baǵdarlamasy arqyly taratylady. Atalǵan qujat boıynsha qalalyq jerde barlyq sharalardy Ulttyq ekonomıka mınıstrligi uıymdastyrsa, aýyldy jerlerde bıznesti damytýǵa Aýyl sharýashylyǵy mınıstrligi jaýapty. "Shaǵyn nesıelenderýge arnalǵan aqsha jumyssyzdar men ózin-ózi jumyspen qamtyp júrgen azamattarǵa beriledi. Alaıda ózin-ózi jumyspen qamtyp júrgender úshin bir shekteý bar. Óz kásibin úsh jyldan artyq júrgizip jatqandarǵa nesıe berilmeıdi. Sebebi ondaı bıznes ábden qalyptasqan. Al úsh jylǵa deıingilerge qoldaý jasaǵan durys. Sondyqtan biz dál osy toptaǵy azamattarǵa nesıe beretin bolamyz. Aqsha alatyndardyń basqa bankterde nesıesi bolmaýy tıis. Bul - barlyǵyna ortaq talap. Sosyn óz kásibin bastyǵysy keletin azamattarǵa arnaıy daıyndyqtan ótken durys. Qazir " Bastaý-Bıznes" degen joba bar. Byltyr atalǵan joba aıasynda myńdaǵan azamattar daıyndyqtan ótip, ózderiniń bıznes-jobalaryn ázirledi. Ótken jyly birazy nesıe ala almaı qaldy. Sondyqtan bıyl biz sol azamattardyń jobalaryna basymdyq beretin bolamyz", - dedi Sh.Axmetov Úkimet úıinde ótken bapasóz máslıxatynda.
Onyń aıtýynsha, nesıeniń kólemi 19 mıllıon teńgege deıin jetedi. Al jyldyq mólsherlemesi 6 protsentten aspaýy tıis. Bıznesti alǵash ret bastaıtyndar úshin memleket kepildiktiń 85 protsentin beredi. Al ózin-ózi jumyspen qamtyp júrgenderdiń nesıesine 50 protsenttik kepildik jasalady. "Qalada "Damý" qory kepildik berse, aýylda jerlerde "QazAgro" xoldıngi kepildik jasaıtyn bolady. Memlekettiń aqshasy da atalǵan qarjy uıymdary arqyly bólinedi", - dep atap kórsetti Sh.Axmetov.
Aıta keteıik, QR Prezıdenti Nursultan Nazarbaevtyń bes áleýmettik bastamasynda shaǵyn nesıelendirýdi keńeıtý mindeti qoıylǵan bolatyn. Atap aıtqanda, Memleket basshysy shaǵyn nesıelerge qosymsha 20 mlrd teńge bólýdi tapsyrdy. «Osylaısha, shaǵyn nesıelendirý kólemi 62 mıllıardqa jetetin bolady. Ásirese, aýyldy jerlerde. Jalpy, aýylda ǵana emes, barlyq jerde adamdar óz bıznesin asha alady. Sonyń arqasynda shaǵyn nesıelendirýdiń kólemi 14 myń adamdy qamtıtyn bolady. Bul ótken jylmen salystyrǵanda eki esege artyq. 14 myń adam ol az emes. Sebebi bir adamnyń qaramaǵynda úsh-tórt, on, bálkim, elý adam jumys isteıtin bolady. Bunyń barlyǵyn qosqanda myqty shaǵyn bıznes shyǵady. Soǵan qoldaý jasaýymyz qajet», - dedi N.Nazarbaev Parlament palatalarynyń birlesken otyrysynda. Osydan keıin QR Eńbek jáne halyqty áleýmettik qorǵaý mınıstrligi aýylda bıznes ashý úshin qansha aqsha beriletinin jarııalaǵan bolatyn.