Shaǵyn nesıe alǵan 657 myń qazaqstandyq tólemin 3 aıdan astam ýaqytqa keshiktirip júr

ASTANA. QazAqparat – Elimizde shaǵyn nesıe alyp, tóleý merzimi 90 kúnnen asyp ketken boryshkerler sany artqan. Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova málim etti, dep habarlaıdy QazAqparat tilshisi.

«Byltyr 11 aıda bankterdiń jeke tulǵalarǵa bergen nesıesi 29,4%-ǵa nemese 13,9 trln teńgege ulǵaıdy. Onyń ishinde tutynýshylyq kredıtter kólemi 24,1%-ǵa, ıaǵnı 7,6 trln teńgege ósti. Zaım alýshylardyń jalpy sany 6 868 myń adamǵa jetti. Tóleý merzimi 90 kúnnen asqan kredıtterdiń úlesi – 5,6% nemese 461 mlrd teńge. 536 myń klıenttiń kredıtin tóleý merzimi 90 kúnnen asyp ketken. Al, bıyl jyl bastalǵaly olardyń sany 121 myń adamǵa artty», - dedi Mádına Ábilqasymova Úkimet otyrysynda.

Agenttik usynǵan málimetke sáıkes, tólem boıynsha problemaly zaım alýshylar sany – 532 myń. Jyl bastalǵaly bul sanattaǵylar 186 myń adamǵa azaıǵan. Qaryz alýshylardyń 76%-ynda 1 mln teńgege deıin bereshegi bar.

«Byltyrǵy jyldyń 11 aıynda mıkroqarjy uıymdary bergen shaǵyn nesıeler kólemi 42,7%-ǵa nemese 979 mlrd teńgege deıin ósti. Mıkrokredıt alýshylar sany – 1 528 myń adam. Merzimi 90 kúnnen asatyn mıkrokredıtterdiń úlesi – 8,0% nemese 76 mlrd teńge. Atalǵan merzim ishinde tólemeı júrgender 257 myń adamǵa jetti. Bul kórsetkish jyl bastalǵaly 115 myń adamǵa azaıdy», - deıdi ol.