Shaǵyn munaı óńdeý zaýyttaryna jeńildikter alynyp tastalýy múmkin - Úkimet
Jıyn barysynda «Atameken» Ulttyq kásipkerlik palatasynyń munaı óńdeý salasyn reformalaý jónindegi usynystary qaralǵan bolatyn. QR energetıka mınıstri Bolat Aqsholaqov shaǵyn munaı óńdeý zaýyttary shyǵaratyn ónimniń sapasyn arttyrý úshin olarǵa tehnıkalyq retteý talaptaryn kúsheıtýdi usyndy. Sondaı-aq, EAEO tehnıkalyq reglamentine sáıkes kelmeıtin munaı ónimderin shyǵaratyn shaǵyn munaı óńdeý zaýyttaryna salyqtyq jáne kedendik jeńildikterdi alyp tastaý qajettigi aıtyldy. Budan bólek, munaı óńdeý zaýyttarynan janar-jaǵarmaı jóneltý kezinde temirjol qyzmetterin kórsetý turǵysynan baǵanyń negizsiz ósýin jáne jekelegen kompanııalardyń básekesiz qyzmetin boldyrmaý úshin tarıfterdi tómendetý týraly da áńgime boldy.
Sonymen qatar, Premer-Mınıstr sýbektilerdiń shekteýli tobyna jeńildikter usynbaý úshin naryqtyń barlyq qatysýshysyna MÓZ-de munaı ónimderin saqtaýdyń biryńǵaı reglamentin ázirleýdi mindettedi. Munaı óńdeý zaýyttarynda negizsiz óndiristik shyǵyndardy boldyrmaý maqsatynda olardyń baqylaý jáne qaýipsizdik júıelerine aýdıt júrgizý tapsyryldy.
«Bul baǵytta búkil tehnologııalyq protsesti qamtı otyryp, baqylaýdyń tsıfrlyq tehnologııalaryn engizý qajet», - dedi Álıhan Smaıylov.
Jalpy, Úkimet basshysy aıtylǵan usynystardy qoldap, keıbireýine túzetýler engizýdi jáne olardy iske asyrý máselelerin pysyqtaýdy tapsyrdy. Otyrys barysynda suıytylǵan gaz naryǵyn, atap aıtqanda, onyń ónimin ónerkásiptik qaıta óńdeýshilerge satý, sondaı-aq tasymaldaý jáne saqtaý boıynsha demonopolızatsııalaý sharalary qaraldy.
Premer-Mınıstr ýákiletti memlekettik organdarǵa baǵalyq sóz baılasýǵa ákeletin jaǵdaılardy anyqtaýdy jáne osy salaǵa qajetti naryq tetikteri boıynsha usynystar engizýdi tapsyrdy.