Shaǵyn munaı óńdeý zaýyttaryna talap kúsheıedi

ASTANA. QazAqparat – Shaǵyn munaı óńdeý zaýyttaryna qoıylatyn talaptar kúsheıtiledi. Bul jaıynda taratylǵan Májilistiń depýtattary saýalyna Energetıka mınıstri Bolat Aqsholaqovtyń jaýabynda aıtylǵan, dep habarlaıdy QazAqparat tilshisi.

«Munaı jáne gaz aqparattyq-taldaý ortalyǵynyń aqparaty boıynsha, 2022 jyly shaǵyn MÓZ-der 840,1 myń tonna munaı óńdegen. Onyń ishinde óndiriletin ónimniń 80 paıyzdan astamy motor otynynyń talaptaryna sáıkes kelmeıtin jáne Qazaqstan Respýblıkasynan tys jerlerge eksporttalatyn munaı ónimderi bolyp tabylady. Osyǵan baılanysty qýaty az munaı ónimderin óndirýshilerdi ishki naryqqa odan ári jetkizý arqyly motor otynyn shyǵarýdy ulǵaıtýǵa yntalandyrý qajet. Sonymen qatar Qazaqstan Respýblıkasynyń otyn-energetıkalyq keshenin damytýdyń 2022-2026 jyldarǵa arnalǵan tujyrymdamasyn iske asyrý jónindegi is-qımyl josparyna sáıkes, shaǵyn MÓZ-ge qoıylatyn talaptardy kúsheıtý boıynsha Zańǵa túzetýler qabyldaý kózdelip otyr», - dedi mınıstr jaýabynda.

Onyń atap ótýinshe, Zańǵa túzetýler ázirleýe Energetıka, Ulttyq ekonomıka jáne Ádilet mınıstrlikteri, «QazMunaıGaz» UK» AQ jáne «KAZENERGY» ZTB jaýapty.

«Osyǵan baılanysty mınıstrlik suranysqa ıe munaı ónimderiniń túrlerin (mysaly, jıyntyǵynda ónimniń jalpy kóleminiń keminde 45 paıyzy benzın, dızel otyny, kerosın, bıtým) mindetti óndirý jáne MÓZ sıpattamalaryn tıisti saraptamalarmen jáne qorytyndylarmen rastaý qajettiligi boıynsha Zańǵa túzetýler daıyndady», - dedi Bolat Aqsholaqov.