Shaǵyn kásipkerlikti damytýdyń 2030 jylǵa deıin tujyrymdamasy ázirlendi

NUR-SULTAN.QazAqparat – Shaǵyn jáne orta kásipkerlikti damytýdyń 2030 jylǵa deıin tujyrymdamasy ázirlendi, dep habarlaıdy QazAqparat tilshisi.

Bul týraly QR Ulttyq ekonomıka birinshi vıtse-mınıstri Tımýr Jaqsylyqov Úkimet otyrysynda málim etti. Aıtýynsha, bul protsess 2023 jylǵa deıin jalǵasady

Vıtse-mınıstrdiń sózine qaraǵanda, kásipkerlik qyzmetti retteýdegi jańa tásilderdi iske asyrý úshin retteýshi memlekettik organdarǵa mynadaı mindetter júktelmek:

óz quzyreti sheginde reformany iske asyrýǵa «taza paraqtan» jobasyna jaýapkershilikpen qaraý;

retteýshilik talaptardy qaıta qaraý jónindegi jumysqa salalyq sarapshylardy belsendi tartý;

osy jumysqa jaýapty memlekettik organdardyń birinshi basshylarynyń orynbasarlaryn aıqyndaý.

«Tutastaı alǵanda, «taza paraqtan» retteýdi engizý boıynsha jumys jospar-keste sheńberinde odan ári jalǵastyrylyp, turaqty baqylaýda bolady.

Memleket basshysy QR Ulttyq kásipkerler palatasynyń 8-shi sezinde shaǵyn jáne orta kásipkerliktiń 2030 jylǵa deıingi jańa damý strategııasyn aıqyndaý mindetin qoıdy.

Osy tapsyrmany oryndaý úshin QR shaǵyn jáne orta kásipkerlikti damytýdyń 2030 jylǵa deıingi tujyrymdamasynyń jobasy ázirlendi.

Bul úshin qujatta ósý áleýeti bar ShOK-qa basym qoldaý kórsetýge baǵyttalǵan salany damytý tásilderi qalyptastyrylǵan», - dedi Tımýr Jaqsylyqov.

Aıtýynsha, ázirlengen tásilderdi iske asyrý mynadaı qaǵıdattardy saqtaý arqyly júzege asyrylady:

- kásipkerlik bastamalardy qoldaý jáne yntalandyrý;

- fıskaldyq parasattylyqty kótermeleý, kóleńkeden shyǵýǵa yqpal etý;

- ShOK básekege qabilettiliginiń ósýine járdemdesý.

ShOK-ty damytý tásilderi pıramıda qaǵıdaty boıynsha qurylady jáne Qazaqstan Respýblıkasynda ShOK-ty damytý problemalaryn sheshýge baǵyttalǵan mynadaı mindetterdi oryndaý arqyly iske asyrylatyn bolady:

1) kásipkerlik belsendilikti qamtamasyz etetin ınstıtýtsıonaldyq orta qurý;

2) bıznes-ahýal men bıznes-ortaǵa áser etetin kásipkerlik qyzmetti retteýdi damytý;

3) memlekettik qoldaý sharalary qurylymynyń tıimdiligin qamtamasyz etý.

Atalǵan sharada Tımýr Jaqsylyqov qańtar oqıǵasy kezinde zardap shekken shaǵyn jáne orta bıznes nysandarynyń naqty sanyn ataǵan bolatyn.