Shaǵyn aýylǵa qyzmet kórsetetin baılanys operatoryna sýbsıdııa berilýi múmkin

ASTANA. QazAqparat - Búgin elordada aqparat, aqparattyq-kommýnıkatsııalyq tehnologııalar jáne memlekettik qyzmetterdi kórsetý salalaryn damytý máseleleri jónindegi qoǵamdyq keńes otyrysy ótti.

Atalǵan keńes tóraǵasy, Májilis depýtaty Qýanysh Sultanovtyń tóraǵalyǵymen ótken jıyn barysynda  qala men aýylda uıaly baılanysty damytýdyń ózekti máseleleri, 1414 biryńǵaı baılanys ortalyǵynyń qyzmeti, ashyq úkimetti damytý jaıy qaraldy.

Birinshi másele boıynsha baıandama jasaǵan qoǵamdyq keńes múshesi Dýlat Orazalınovtyń aıtýynsha, Qazaqstan halqyn tolyqtaı keńjolaqty ınternetpen jáne uıaly baılanys qyzmetimen qamtamasyz etýge múmkindik bar.

«Búgingi kúni Qazaqstan halqynyń 4 paıyzyn qospaǵanda barlyq eldi mekenderde 2G deńgeıinde uıaly baılanys bar. Uıaly baılanys operatorlary turǵyndary myń adamnan asatyn aýyldarǵa jetti. Endigi ýaqytta turǵyndary 500-den asatyn aýyldardy 2020 jylǵa deıin uıaly baılanyspen qamtý mindettememin alyp otyr. Bul atalǵan aýyldardyń barlyǵy 2G deńgeıli uıaly baılanyspen qamtamasyz etiledi degendi bildiredi», - dedi ol.

Qoǵamdyq keńes múshesiniń sózine qaraǵanda, uıaly baılanys operatorlary aýyldyq jerlerdi baılanyspen qamtý barysynda shyǵynǵa batty. Sebebi aýyl kez kelgen uıaly baılanys operatoryna shyǵyn ákeledi. Sondyqtan 2004 jyly Baılanys týraly elimizdiń zańynda sýbsıdııalaý tetikteri  kózdeldi. Búginde bul tetik óziniń mindetin tolyqtaı aqtap otyr. Demek, aýyldardy sýbsıdııalaýdy alyp bastap, erkin básekelestikti engizýge bolady.

«Degenmen, 50-100 adam turatyn shaǵyn ǵana eldi mekender bar. Al mundaı aýyldarda baılanys joq. Tipti, baılanys bolsa da olarǵa sýbsıdııa bólý qajet. Óıtkeni ol jerde básekelestiń bolýy múmkin emes. Halqy 500 adamnan asatyn aýyldar - uıaly baılanys operatorlarynyń lıtsenzııalyq mindettemeleri. Sondyqtan olarǵa sýbsıdııa bólýdiń qajeti joq», - dedi Dýlat Orazalınov.