«Shabyt» qoǵamdyq qorynyń basty mindeti - daryndy jastardyń bolashaǵyna óris ashý- Qordyń atqarýshy dırektory T. Tólebekov
- Aldymen Qor jaıynda az-kem maǵlumat berip, onyń jumysymen tanystyryp ketseńiz?
- «Shabyt» qoryn qurý ıdeıasy 2009 jyldyń qarashasynda dúnıege keldi. Byltyr halyqaralyq «Shabyt» shyǵarmashyl jastar festıvali aıasynda dóńgelek ústel otyrysy ótip, onda TMD elderiniń jastary men qazaqstandyq ónerpazdar jas daryndardy qoldaýǵa baǵyttalǵan «Shabyt» qoryn ashý týraly bastama kóterdi. Qazirgi ýaqytta qordyń jumysy QR Mádenıet mınıstrliginiń qolǵabysymen jolǵa qoıylyp keledi. Qordyń qyzmeti eldegi mádenı mańyzy zor sharalardy uıymdastyrýǵa, sheberlik-synyptaryn, semınarlar men trenıngterdi ótkizýge baǵyttalǵan. Mádenıet salasyndaǵy básekege qabiletti jobalardyń damýy úshin jáne onyń túp qazyǵy men qozǵaýshy kúshi bolyp tabylatyn jastardyń shyǵarmashylyq áleýetiniń joǵarylaýy úshin mádenı sharalardyń kóptep ótkizilip turǵany qajet.
- Jastar ózderiniń aldynda turǵan túıtkilderdi biledi jáne ol máselelerdi sheshýde eshkimge alaqan jaıyp, qarjy suraǵan emes. Jastar memleketten aqsha surap otyrǵan joq, memleket árdaıym qarajat bóle bermeıtinin de jaqsy túsinedi. Sondyqtan da qordyń qanatynyń astynda toptasqan jastardyń tileıtini - festıvalderdiń, baıqaýlardyń, túrli saladaǵy jarystardyń kóptep uıymdastyrylýy. Sonyń arqasynda jas urpaq óz ónerin halyqqa pash etip, ónerlerimen kórinýge múmkindik alady, shyǵarmashylyǵyn shyńdaıdy.
- Qordyń muryndyq bolýymen bıyl jastarǵa qolǵabys bolǵan qandaı sharalar júzege asyryldy?
- Bizdiń basty mindetimiz - keleshekke keleli jol salyp, daryndy jastardyń bolashaǵyna óris ashý. Sondyqtan da bizdiń qor jyl basynan beri Qazaqstan, sonymen qatar TMD aýmaǵynda túrli konferentsııalar, is-sharalar, forýmdar dóńgelek ústelder, baıqaýlar uıymdastyryp, jas ónerpazdarǵa jáne shyǵarmashyl jastarǵa arnalǵan sheberlik-synyptaryn ótkizdi. Bıyl atqarylǵan aýqymdy sharalardyń qataryna úsh márte uıymdastyrylǵan respýblıkalyq sheberlik-synyptaryn jatqyzýǵa bolady.
Ondaı sharalar kezinde Qazaqstanda belsendi ári bastamashyl jastardyń kóptigin ańǵardyq. Máselen, tsırk juldyzy Murat Muturǵanov balǵyndarǵa da, eresek kórermenderge de qyzyqty tsırk shoýy televızııalyq jobasyn ashý jóninde usynys tastady. Hareografııa ónerinde de osy ispettes qyzyqty ıdeıalar bar. Stýdentterdiń biri bizge kelip, halyq bıleri festıvalin ótkizý týraly jobasyn kórsetti. Buny óńdeý barysynda oı ary qaraı damytylyp, halyq bılerin úıretetin dıskiler shyǵarý jóninde sheshim qabyldadyq. Bul da osy saladaǵy tyń qadam. Qazirgi ýaqytta latyn, úndi bıleriniń qımylyn úıretetin dıskiler dúken sórelerinde qaptap tur. Bizge de ulttyq bıimizdi dáriptep, oǵan balany kishkentaı kezinen kásibı túrde baýlıtyn otandyq ónimderdi nege shyǵarmasqa?! Atalǵan joba jasalý ústinde. Osy ispettes usynystar men pikirler jetip artylady. 2011 jyly biz shyǵarmashylyqpen aınalysyp júrgen barlyq jastardy jınap, úlken konferentsııa ótkizbekshimiz, onyń barysynda jastar utymdy usynystaryn ortaǵa sala alady. Keıin bul usynystardy QR Mádenıet mınıstrligine, Bilim jáne ǵylym mınıstrligine joldap, jobalardyń iske asyrylýyna qoldaý kórsetýlerin suraıtyn bolamyz.
- Qor júzege asyrýdy kózdep júrgen halyqaralyq jobalar bar ma?
- Qor qyzmetindegi negizgi basymdyqtardyń biri - qazaq mádenıetin álemdik keńistikpen yqpaldastyryp, mádenıetaralyq kelisimdi damytý bolyp tabylady. Joǵaryda atap ótkenimdeı, Qazaqstanda TMD-daǵy áriptesterimizdiń qatysýymen kóptegen sharalar ótkizildi. Osyndaı jıyndardyń birinde máskeýlik áriptesterimiz shyǵarmashylyqpen aınalysatyn jastardyń birlesken tobyn quryp, qazaq-orys fılmin túsirý týraly ıdeıa aıtty. Biz qazir bul joba boıynsha kelissózder júrgizip jatyrmyz. Al qyrǵyz baýyrlarymyz kóshpeli Azııa festıvalin ótkizý jóninde usynys bildirdi. Atalǵan festıvalde ár eldiń onshaqty ónerpazdary ózderine úırenshikti emes, ónerdiń basqa janrynda baǵyn synap kóretin bolady. Ózbekstan jastary bolsa, estrada festıvalin uıymdastyrý týraly oılaryn aıtty. Jazda «Óner zerthanasy» atty jobany iske asyrmaq oıymyz bar. Bul joba aıasynda Astanaǵa álemniń ár túkpirinen fotosýretshilerdi shaqyryp, olardyń elordaǵa degen kózqarastaryn biletin bolamyz. Ideıalar kóp, olardyń barlyǵy derlik óte qyzyqty.
- Áńgimeńizden Qordyń alǵashqy jyly atqarǵan jumystary nátıjeli ári mańyzdy bolǵany baıqalady.
- Iá, bıyl bizdiń bastamamyzben túrli jobalar atqaryldy. Al kúni keshe eldiń birqatar shyǵarmashyl jastaryna jáne mádenıet salasyn qoldap júrgen otandyq uıymdarǵa «Shabyt» baıqaý-syılyǵynyń tabys etildi. Buny - jyl ishinde atqarǵan nátıjeli jumysymyzdyń sharyqtaý shegi dep atasa da bolady.
- Sizderdiń konkýrstaryńyzdyń basqa konkýrstardan qandaı aıyrmashylyǵy bar?
- Bizdiń konkýrsymyzdyń basqalarynan basty aıyrmashylyǵy - onyń táýelsiz jáne ádil ótkizilýinde. Jeńimpazdar Qazaqstan halqy arasynda júrgizilgen áleýmettik saýaldardyń nátıjesi boıynsha tańdalynady, keıin sol salanyń jiligin shaǵyp, maıyn ishken bilikti mamandardan, ónertanýshy jáne mádenıet qaıratkerlerinen quralǵan qazylar alqasy úzdikterdi anyqtaıdy. Myqtylardy anyqtaýda úderisine eshkimniń de yqpal etpeýi úshin, ádilqazylar alqasy músheleriniń aty-jónderi qupııa saqtalady. Qordyń qurylýynyń ózi bir ǵajap boldy. Sebebi ol jastardyń bastamasymen dúnıege keldi, keıin QR Mádenıet mınıstrliginiń qoldaýyna ıe boldy. Qorda eldiń jas býynyn qandaı máseleler tolǵandyryp júrgeninen habary bar jastar jumys jasaıdy. Ártister, sýretshiler jáne basqa da ónerpaz azamattar jyl sońynda óner salasyndaǵy jetistikterdi aıshyqty qorytyndylaı bilgen Qordyń qurylǵanyna shyn kóńilderimen qýanyp otyr. Ásirese, memlekettiń qarqyndy damý úderisinen qalyspaı, ónerdiń osynshama sharyqtap, damyp jatqan tusynda mundaı ıgi isterge qýanbaǵan adam joq shyǵar. Mádenıet - búkil el bolyp damytýdy qajet etetin aıryqsha sala. Kelesi jyl biz úshin osyndaı qyzyqty ári mańyzdy sharalarǵa toly bolady degen úmitim bar. Al «Shabyt-2011» laýreattary 2010 jyldyń jeńimpazdarynan kem emes, olar úzdik ónerpazdar atanýǵa ábden laıyqty azamattar.
- Suhbatyńyzǵa raqmet!