«Shabyt» festıvalinde QR Prezıdentiniń kýbogin A. Mustafaev jeńip aldy
3-8 qarasha kúnderi ótken baıqaýda Qazaqstan men TMD elderinen kelgen 500 ónerpaz 6 atalym boıynsha baq synasty. "Klassıkalyq mýzyka" atalymynda tórt qatysýshy Gran-Prı ıelendi: Roza Lebedeva (aǵash úrmeli aspaptar), Jasulan Ábdihalyqov (mys úrmeli aspaptar), Bolat Turabekov (soqpaly aspaptar) jáne Petr Babın (baıan, akkordeon).
"Beıneleý óneri" atalymynda Almas Mustafaevtyń músini úzdik dep tanyldy. Al Semeı qalasynyń ókili Qýat Kıikbaıdyń prozasy "Úzdik ádebı shyǵarma" atandy. "Estradalyq vokal" atalymynda Kıev qalasynan kelgen Margarıta Meleshko óziniń shyǵarmashylyǵymen qazylar alqasyn tánti etti.
Sonymen qatar Qazaq ulttyq óner ýnıversıtetiniń "Shabyt" bı ujymy "Horeografııa" atalymynda jáne "Kók túrikter" folklorlyq-etnografııalyq ansambli "Halyq mýzykasy" atalymynda Gran-Prı enshiledi.
Al "Shabyt" shyǵarmashyl jastar festıvaliniń 2013 jylǵy Bas júldesin - QR Prezıdentiniń Kýbogin Almas Mustafaev óziniń Orteke dala teatrymen jeńip aldy.
"Orteke teatrynda músin óneri de, perfomans ta, mýzykalyq aspaptar da bar. Orteke bizdiń ulttyq jáne mádenı brendimiz. Degenmen birneshe onjyldyqqa joǵaltyp aldyq. Qazir ony birtindep jandandyryp kelemiz. Kýbokti osy salaǵa bergenimiz ýaqyt talaby dep sanaımyn. Avtorǵa onyń eńbegi úshin alǵys aıtamyn", - deıdi baıqaýdyń ádil qazylar alqasynyń múshesi, QR Sýretshiler odaǵynyń múshesi Aıjan Bekqulova.
Aıta keteıik, festıvalǵa qatysqan ónerpazdardyń qabiletterin Qazaqstan, Izraıl, Reseı, Polsha, Qyrǵyzstan, Italııa, Ýkraına, Belarýs, Latvııa jáne Túrkııa elderiniń kórnekti mádenıet jáne óner qaıratkerleri baǵalady.