Seısmologııalyq zertteýlerge 1,5 mlrd teńge bólinbek

<p>ASTANA. KAZINFORM &ndash; 3 jyldyq seısmologııalyq zertteýlerge 1,5 mlrd teńge bólý josparlanǵan. Bul týraly Ǵylym jáne joǵary bilim mınıstrliginen málim etti.</p>

«Seısmologııa ınstıtýty 2023 jyldyń jeltoqsan aıynan bastap «Seısmologııalyq baıqaý jáne zertteýler ulttyq ǵylymı ortalyǵy» (SBZUǴO) bolyp atalady. 2024 jyldyń 9 qańtarynda «Ǵylym týraly» Qazaqstan Respýblıkasy Zańynyń 23-babyna sáıkes ǵylymı jáne ǵylymı-tehnıkalyq qyzmet sýbektisi retinde bes jyl merzimge akkredıtatsııalandy. Baǵdarlamalyq-nysanaly qarjylandyrý aıasynda 2024-2026 jyldarǵa arnalǵan Ǵylym mınıstrligi jarııalaǵan konkýrsqa «Qazaqstannyń oblystary men qalalary aýmaqtarynyń seısmıkalyq qaýiptiligin zamanaýı ǵylymı-ádistemelik negizde baǵalaý» ǵylymı-tehnıkalyq tapsyrmasyna qatysyp jatyr», - dep atap ótti mınıstrlikten agenttiktiń resmı saýalyna oraı.

Vedomstvo málimetinshe, 2025 jyldan bastap SBZUǴO ǵylymı-tehnıkalyq baǵdarlamalaryn memlekettik tapsyrma retinde qarjylandyrý joldary qarastyrylyp jatyr.

«Prezıdent Qasym-Jomart Toqaevtyń buıryǵymyn, Almaty qalasynyń ákimdiginiń qoldaýymen jabdyqtardy jańǵyrtýǵa 2024 jylǵa 500 mln tenge bólindi jáne 2024-2026 jyldarǵa seısmologııalyq zertteýler baǵytynda ǵylymı-tehnıkalyq jobany qarjylandyrý josparlanýda. Jobanyń quny 1,5 mlrd. tengeni quraıdy. Sonymen qatar SBZUǴO ǵımaratyna kúrdeli jóndeý jumystaryn júrgizý jobasy daıyndalýda», - dedi mınıstrlikten.

Eske sala keteıik, buǵan deıin 2024-2025 jyldary Qazaqstan aýmaǵynda 5 seısmıkalyq stansy ornatylatynyn jazǵan bolatynbyz.