Seısenbide 4 óńirde úsik saqtalady

NUR-SULTAN. QazAqparat – 20 qyrkúıekte Qazaqstan aýmaǵynyń basym bóligi áli de aýqymdy antıtsıklon yqpalynda bolady. Osyǵan baılanysty jaýyn-shashynsyz aýa raıy saqtalady. Atmosferalyq frontaldy bólikterdiń ótýimen elimizdiń batysynda, ońtústik-shyǵystyń taýly aýdandarynda naızaǵaı oınap, jańbyr jaýady. Jekelegen óńirlerde jel kúsheıip, ońtústikte, ońtústik-batysta shańdy daýyl turady. QazAqparat bul týraly Qazgıdrometke silteme jasap habarlaıdy.

Seısenbi kúni Qyzylorda, Túrkistan, Jambyl oblystarynyń basym bóliginde, Qaraǵandy oblysynyń ońtústiginde, Ulytaý, Aqtóbe oblystarynyń shyǵysynda, Almaty oblysynyń soltústiginde jáne ortalyǵynda, Abaı oblysynyń soltústik-batysynda, soltústiginde, shyǵysynda, Atyraý oblysynyń soltústiginde tótenshe órt qaýpi saqtalady.

Qostanaı oblysynyń ońtústiginde, Pavlodar oblysynyń ortalyǵynda joǵary órt qaýpi saqtalady.

Túnde Aqmola oblysynyń shyǵysy men ortalyǵynda, Qaraǵandy oblysynyń soltústiginde jáne shyǵysynda, Shyǵys Qazaqstan oblysynyń soltústik-shyǵysynda, Abaı oblysynyń batysynda 1-3 gradýs úsik saqtalady.