Seıdahmet Quttyqadam: Elimizde talanttar qaınap jatyr – solardy iske jumyldyrý kerek

NUR-SULTAN. QazAqparat – Saıasattanýshy, QR Eńbek sińirgen qaıratkeri, Ulttyq qoǵamdyq senim keńesiniń múshesi Seıdahmet Quttyqadam búgingi Ulttyq qoǵamdyq senim keńesiniń alǵashqy otyrysy týraly pikirin bildirdi, dep habarlaıdy QazAqparat tilshisi.

«Ár qoǵamnyń, ár halyqtyń aldyna osyndaı tarıhı kezeńder keledi. Mundaı jıyn kúnde bolmaıdy. Osyndaı tarıhı múmkindik búgin bizge týyp tur. Sebebi, baıqasańyz sózdiń baǵyty basqasha: maqtaý da, madaqtaý da joq. Tek sharýa máseleleri talqylanyp jatyr. Sodan keıin Prezıdenttiń ózi ózgeristerdi qozǵap otyr. Meniń oıymsha, osy múmkindikti qur jibermeýimiz kerek. Tarıhty qarasańyz, qansha jyl boıy qınalǵan jurtpyz. Patshanyń bodanynda boldyq. Keıin sovettik kezeńde ómir súrdik. Al qazir ózimizdiń táýelsiz elimizde talanttar qaınap jatyr. Ár salada joldary ashylmaı júrgender bar. Solardy iske jumyldyra bilsek, keremet ózgerister bolady», - dedi Seıdahmet Quttyqadam.

Ulttyq qoǵamdyq senim keńesiniń múshesiniń aıtýyna qaraǵanda, búgingi usynystar boıynsha nátıje bolady.

«Biraq, menińshe, asyǵýǵa bolmaıdy. Bul bir kúnde nemese bir túnde ózgeretin nárse emes. Qansha jyl boıy jınalǵan problemalardy tez sheshý múmkin emes. Degenmen, satylap, baıyptap, máselelerdiń bárin sheshýge bolady. Keıbir azamattarymyz peıishti bir kúnde ornatpaq. Ol bolmaıdy. Daıyndyq kerek», - dedi ol.

Eske sala ketsek, búgin elordada Ulttyq qoǵamdyq senim keńesiniń alǵashqy otyrysy ótti. Otyrysqa Qazaqstan Prezıdenti Qasym-Jomart Toqaev qatysty.

Ulttyq keńestiń quramy belgili memleket jáne qoǵam qaıratkerleriniń, saıası partııalar, úkimettik emes sektor ókilderiniń qatarynan qalyptastyrylady.

Qazaqstan Respýblıkasy Prezıdenti Ákimshiliginiń Basshysy, Qazaqstan Respýblıkasyndaǵy Adam quqyqtary jónindegi ýákil, Qazaqstan Respýblıkasyndaǵy Bala quqyqtary jónindegi ýákil, Qazaqstan kásipkerleriniń quqyqtaryn qorǵaý jónindegi ýákil óz laýazymdaryna sáıkes Ulttyq keńestiń quramyna kiredi.