«Sevkazenergo» kompanııasy jylý-elektr ortalyǵyn jóndeýge 17,6 mlrd teńge bóldi

<p>PETROPAVL. KAZINFORM &ndash; Soltústik Qazaqstan oblysy ákimdiginiń otyrysy ótip, jylytý maýsymyna daıyndyq máseleleri talqylandy.</p>

SQO ákimi baspasóz qyzmetiniń málimetinshe, bıyl «Sevkazenergo» AQ Petropavl 2-jylý-elektr ortalyǵyn jónge keltirýge 17,6 mlrd teńge jumsamaq. Bul qarjyǵa 4 qazandyq men 3 týrboagregatty kúrdeli jóndeý jáne qaıta jańartý, sondaı-aq murjany jóndeý josparlanǵan. Qazirgi ýaqytta jańa murjanyń qurylysy júrip jatyr.

«Soltústik Qazaqstan Elektrjelistik taratý kompanııasy» AQ 402 shaqyrym elektr jelisin jáne 54 qosalqy stantsııany jóndeýdi jáne qaıta qalpyna keltirýdi josparlap otyr.

«Kókshetaý Energo» JShS-i 1070 shaqyrym elektr jelisi men 186 qosalqy stantsııany jóndeıdi.
«Petropavl jylý jelileri» JShS-i 7 shaqyrym jylý jelisin jóndeý jáne qaıta jańartý jumystaryn júrgizedi. Eki jylý magıstraliniń qurylysy da aıaqtalady.

Oblysta bıýdjettik uıymdardaǵy 151 qazandyqty aýystyrý josparlanǵan.

Oblys ákimi Ǵaýez Nurmuhambetov jaýapty memlekettik organdarǵa josparlanǵan barlyq jumystardy merziminde aıaqtap, aldaǵy jylý berý maýsymynyń úzdiksiz ótýin qamtamasyz etýdi tapsyrdy.

Buǵan deıin SQO boıynsha kóliktik aqylaý ınspektsııasyna jańa basshy taǵaıyndalǵanyn aıtqan edik.