Seýlde turmysy nashar turǵyndardy aptap ystyqtan qorǵaý sharalary kúsheıtildi

ASTANA. QazAqparat – Seýl qalasynyń bıligi boljamǵa sáıkes tamyz aıynyń basyna deıin jalǵasatyn aptap ystyqty «apatty jaǵdaı» dep baǵalap, halyqtyń osal toptaryn odan qorǵaý sharalaryn kúsheıtetinin málimdedi, dep habarlaıdy QazAqparat Yonhap agenttigine silteme jasap.

Jergilikti bılik qala turǵyndarynyń osal toptaryna qoldaý kórsetý jáne tamyz aıyna boljanǵan aptap ystyqtan zııan kelýiniń aldyn alýǵa kúsh salýdy josparlap otyr.

Áleýmettik qamsyzdandyrý nysandaryn salqyndatý shyǵyndaryna qosymsha 735 mln von bólinedi, sebebi elektr qýaty qunynyń qubylýyna baılanysty olarǵa salmaq túsýi múmkin. Atap aıtqanda, 760 áleýmettik mekemege qoldaý kórsetiledi.

Sonymen qatar, qala turǵyndary úshin «túngi panalaý orny» kóbeıedi. Buryn mundaı oryndy 20 kún boıy paıdalanýǵa bolatyn, al tamyz aıynan bastap, eger bos oryn bolsa, shekteýsiz paıdalanylady. Onda shomylý men uıyqtaýǵa múmkindik bar.

Qazirgi kezde Nambang kentinde tumandatqysh ornatylǵan. Tuman tamshylary qorshaǵan ortanyń temperatýrasyn 3-5 gradýsqa tómendetedi. Sondaı-aq, keıbir úılerge jyljymaly salqyndatqyshtar ornatylady.

Ystyq maýsymda 51 jedel járdem brıgadasy turǵylyqty jeri joq adamdap kóp júretin aýdandardy kúnine keminde tórt ret patrýldeıdi. Olar adamdarǵa bótelkedegi sý men basqa da birinshi kezekte kerek zattardy taratyp, qajettilik týyndaǵan jaǵdaıda medıtsınalyq qyzmettermen baılanystyrady.