Serjant Araılym Baımýrzına: Qazaq qyzdary namystan jaralǵan

SEMEI. QazAqparat -  Áskerı qyzmet  áıel adamy úshin óte aýyr, qıynshylyǵy mol sala dep jatady. Degenmen búgingi kúni áskerı ortadaǵy temirdeı tártipke, erekshe talaptarǵa tózip júrgen názik jandar az emes. Solardyń biri Araılym Maqanqyzy.

Semeı qalasyndaǵy «Shyǵys óńirlik» qolbasshylyǵyna qarasty 5511 áskerı bóliminiń mýzykant - kontsertmeısteri, serjant Araılym  Baımýrzına  Ulttyq ulannyń «Shyǵys» óńirlik qolbasshylyǵynda qyzmet atqarady. Araılymnyń  osy salada eńbek etip kele jatqanyna  bıyl 15 jyl tolady.  Árıne, bir qaraǵanda  mýzykanttyń jumysy ońaı-aq sharýa sııaqty kórinedi. Biraq, olaı emes. Sebebi, áskerı bólimde barlyǵyna talap bir.  Tańnan keshke deıin tek mýzykamen aınalyspaıdy. Áskerı bólimde kún saıyn er azamattarmen qatar barlyq jattyǵýlar men tapsyrmalardy da qatar oryndaıdy. Degenmen, názikjandy temirdeı tártipti talap etetin qyzmetke tóselip alǵanyn aıtady.

Araılym 1974 jyly 15 -shi qarashada sol kezdegi Aqsýat aýdany, Qyzyl kesik aýylynda qarapaıym otbasynda dúnıege kelgen. Ákesi Maqan ónerli adam bolǵan. Aqyn, ánshi-kompozıtor. Jas  qyzdyń boıyndaǵy óneri ákesi  arqyly darysa kerek. 11-shi synypty támdaǵan soń Araılym áke jolyn jalǵastyrmaq bolady. Sóıtip, 1992 jyly Semeıdegi Muqan Tólebaev atyndaǵy mýzykalyq ýchılışesine «Rejısser» mamandyǵyna oqýǵa túsedi.   

«Ákem Maqannyń birneshe óneri bar edi. Ánshiligi men kompozıtorlyqtan basqa  aqyn da edi. Ákem «Qazaq SSR-ine eńbegi sińgen mádenıet qyzmetkeri» degen ataqty alǵash bolyp alǵan jandardyń biri. Meni es bilgennen ónerge baýlydy. Sol kezde otbasylyq ansambl bolyp, túrli mádenı sharalarda óner kórsettik. Sondyqtan bolar ómirimdi mýzykasyz elestetý múmkin bolmady»,-deıdi ol.

Araılym alǵashqy eńbek jolyn 1998 jyly Jarma aýdanyndaǵy Mádenıet úıinde mýzykant bolyp bastaıdy. «Sulýym» qyzdar ansamblinde óner kórsetip, halyq orkestirinde dombyrashy bolady. Al áskerı salaǵa 2001 jyly keledi. Jańǵyztóbe stantsııasyndaǵy, Shýaq kentindegi 156/16 túzetý mekemesinde baqylaýshy bolyp jumys isteıdi. 2004 jyly «Shyǵys óńirlik» qolbasshylyǵyna qarasty 5511 áskerı bólimine mýzykant-kontsertmeıster bolyp jumysqa kiredi. Mine, sodan beri áskerı salada eńbek etip kele jatqanyna 15 jyl. Bıyl zeınet demalysyna shyǵady.
 

«2004 jyly áskerı bólimge mýzykanttar kerek degendi estip kelgenmin. Mine sodan beri 15 jyl ótipti.   Bıyl 15-shi qarashada zeınetke shyǵamyn. Áıel adam tabıǵatynan shydamdy ǵoı. Al áskerı ómir meni odan saıyn tózimdilikke úıretti. Osy ýaqytqa deıin bul qyzmetke kelgenime esh ókingen emespin. Áskerı salada jumys istegenime maqtanamyn»,-dedi Araılym.

Araılym áskerı salada júrse de, bala tárbıesin de kenje qaldyrǵan emes. Uly Qýanysh er jetip, qyzy Botagóz boıjetti. Qos qulyny oqý ornyn bitirip, búginde ózderi adal eńbek etýde. Aıaýly ananyń endigi armany ul-qyzynyń qýanyshyn kórip, solardyń baqytyna bólený.