Serik Jumanǵarın Qaraǵandy oblysynyń agrosala ókilderimen kezdesti
Jumys saparynyń maqsaty – kóktemgi dala jumystaryn qorytyndylaý jáne óńirdiń sharýashylyqtarymen tanysý, dep habarlaıdy Úkimettiń baspasóz qyzmeti.
Olar Kóbeteı aýylyndaǵy sút-taýar fermasynyń qurylys alańyna bardy. Kásiporyn golshtın sıyrlaryn ákelgen. Joba 1100 iri qara maldy ustaýdy qarastyrady. Ferma jobalyq qýattylyqqa shyqqan kezde jylyna 9000 tonnaǵa jýyq sút óndiredi dep josparlanýda. 70-ke jýyq jumys orny ashylady. Jumysqa ornalasý kezinde birinshi kezekte jergilikti turǵyndar qabyldanady. Sonymen qatar STF ózin azyqpen qamtamasyz etedi. Jalpy Qaraǵandy oblysynda mal sharýashylyǵy belsendi damyp keledi.
Ósimdik sharýashylyǵy salasynda aımaq óndirýshileri sýarmaly eginshilikke basa nazar aýdarady. Josparlar týraly Qaraǵandy oblysy ákiminiń orynbasary Baýyrjan Asanov baıandady.
«Bıyl aýyl sharýashylyǵy daqyldary 1,1 mln gektarǵa egildi, bul ótken jylmen salystyrǵanda 37,6 myń gektarǵa artyq. Bul rette dándi daqyldar 966,3 myń gektardy, maıly daqyldar 31 myń gektardy qurady. Kartop 11,5 myń gektarǵa, basqa kókónister 1,2 myń gektarǵa otyrǵyzyldy. Sýarmaly jerler aýmaǵy ulǵaıtylady»,— dep habarlady ol.
«Shahterskoe» elıtalyq tuqym ósirý kásiporny da delegatsııanyń nazarynan tys qalmady. Munda jyl saıyn sýarmaly jerlerdiń aýmaǵy keńeıtiledi. Aınalymǵa sý alý jáne berý úshin barlyq ınfraqurylymy bar qosymsha 200 ga engizildi. Qazirgi zamanǵy tuqym tazartý jelisi salynýda. Ol dándi, maıly jáne burshaq tuqymdaryn daıyndaýǵa arnalǵan.
«Shahterskoe» JShS basshysy Georgıı Prokop astyq qoımasy men astyq keptirgishti kórsetip, Qazaqstannan tys jerlerde belgili kartop ósirý týraly aıtyp berdi.
«Búgin biz aýyl sharýashylyǵyn sýbsıdııalaý salasynda bolyp jatqan aıtarlyqtaı ilgerileýshilikterdi kórip otyrmyz. Bul bizge odan da úlken jaýapkershilik júkteıdi. Biz barlyq kúsh-jigerimizdi jumsap, laıyqty ónim alý jáne ónimdilikti eki ese arttyrý úshin jaqsy jumys isteýimiz kerek»,— dep atap ótti ol.
Vıtse-premer Serik Jumanǵarın fermerlermen kezdesý barysynda Úkimettiń aýyl sharýashylyǵy taýaryn óndirýshilerdi qoldaý jónindegi josparlary, fermerler úshin «Keń Dala-2» baǵdarlamasy boıynsha 5% jeńildikpen nesıe berý múmkindikteri jáne qarajat alýdyń qarapaıymdatylǵan tetigi týraly aıtyp berdi. Sonymen birge ol fermerlerge agrarshylardyń agrotehnıkany jaqsartýǵa kóbirek kóńil bólý, tyńaıtqyshtar, tuqymdar engizý, joǵary ónimdi tehnıkany qoldaný jáne t. b. mindettemeleri jóninde eske sala ketti.
«Bıyl kóktemgi egis jumystaryna 580 mlrd teńge bólindi. Fermerlerge arnalǵan memlekettik baǵdarlamalar jumys isteıdi. Qarqyndy damýǵa múmkindik bar. Tuqymǵa, pestıtsıdterge, mıneraldy tyńaıtqyshtarǵa, janar-jaǵarmaıǵa, qosalqy bólshekterge, tehnıkaǵa qarajat bólinedi. Endi fermerler mal sharýashylyǵyn qoldaýdy suraıdy. Barlyq máselelerdi kezeń-kezeńimen sheshemiz, eginniń jaqsy ónýin kórip otyrmyz, jaqsy ónim kútemiz», — dep óz kezeginde atap ótti aýyl sharýashylyǵy mınıstri Aıdarbek Saparov.