Serik Shápkenov Jaıyq jaǵalaýyndaǵy eldi mekenderdi sý tasqynynan qorǵaý jumysyn tekserdi
Atyraý oblysy ákimdigi baspasóz qyzmetiniń aqparatyna qaraǵanda, sý tasqynyna qarsy 522 shaqyrym bóget salynǵan. Sý aıdynynyń jaǵalaýyna qum toltyrylǵan 5 mıllıonnan astam qapshyq tóselgen.
Qazir Mahambet jáne Inder aýdandaryndaǵy eldi mekenderdi sý tasqynynan qorǵaý jumysy áli toqtaǵan joq. Óıtkeni Jaıyq ózenindegi sý deńgeıi kún saıyn kóterilip jatyr. Máselen, búgin, 10 mamyrda saǵat 12:00-de Mahambet aýylynda Jaıyq ózeniniń deńgeıi 927 santımetrge jetti. Bul qaýipti deńgeıden +77 santımetrge kóp.
Al, Inder aýdanynyń ortalyǵy – Inderbor kentiniń tusynda 1016 sm qurady. Munda qaýipti shekten 171 santımetrge asyp tur. Atyraý qalasyndaǵy gıdrobekette Jaıyq ózeniniń deńgeıi – 530 sm.
Mahambet aýdanynda Jaıyq ózeniniń jaǵalaýyna salynǵan bógettiń uzyndyǵy – 65,5 shaqyrym, ortasha bıiktigi – 3 metr. Qosymsha 1,5 shaqyrym bógetti kóterý jáne nyǵaıtý jumysy júrgizilgen.
Serik Shápkenovtiń pikirinshe, Mahambet aýdanyndaǵy Taldykól aýylynda jaǵalaýdy erozııadan qorǵaý úshin qosymsha jumys júrgizý, bógetti odan ári nyǵaıtýdy jalǵastyrý qajet. Mundaı jumys Saraıshyq aýylynda da júrgiziledi.
Qazir Jaıyq ózenindegi sý keıbir aýyldardyń tusynda jaǵalaýdaǵy bógetke tirelip tur. Osyǵan baılanysty Inderbor kentinde 2 600 metr bógetti nyǵaıtý jumystary kúsheıtiledi. Bul jumysty atqarýǵa 15 tehnıka tartylǵan. Osy aýdandaǵy Eltaı aýylynda bógetti nyǵaıtý isine 70 áskerı qyzmetker men eriktiler jumylǵan. Olarǵa 4 tehnıka bólingen.
Eske sala ketelik, budan buryn Jaıyq ózenindegi sý deńgeıi Atyraýdaǵy Inderborda – 10, Mahambette 9 metrden asqanyn jazǵan edik. Al, Mahambet aýdanynda eki aýyldyń arasyndaǵy jol jyrylyp, qatynas ýaqytsha toqtady.