Serik Shápkenov Qulsary turǵyndary tutynatyn aýyz sý sapasyn jaqsartýdy tapsyrdy
Sońǵy birneshe kúnnen beri Qulsary qalasynyń turǵyndary aýyz sýdyń laılanǵany týraly shaǵymdanyp jatyr. Aýyz sý «Astrahan-Mańǵyshlaq» magıstraldyq sý qubyrynyń jańa lýpıngin paıdalanýǵa berý kezinde lastanǵany belgili boldy.
«Sý tazartý qondyrǵylarynda sý quramy laıdan tolyq tazartylmaı, Qulsary qalasyna qajetti sý kólemi berilmedi. Laılaný kórsetkishi standartqa saı emes. Osyǵan baılanysty laı sýdy jınaqtaý rezervýarlarynan aǵyzýdy, qubyrlar tolyq tazarǵansha magıstraldyq jeliden sý jiberýdi tapsyrdy», - dep habarlady oblystyq jedel shtab.
Jylyoı aýdany ákimdiginiń málimetinshe, Qulsary qalasyn aýyz sýmen «Jylyoısý» MKK qamtıdy. Alaıda, kásiporynnyń sý aıdaý stantsııasyndaǵy qazandarynda sý qory azaıǵan. Oǵan sebep – «Magıstraldyq Sýaǵyzǵysy» JShS-niń sý tazartý stantsııasy qajetti sý qorymen qamtamasyz ete almaýy.
Qulsaryǵa sý «Astrahan-Mańǵyshlaq» magıstraldyq qubyrymen tasymaldanady. Bul qubyrǵa sý Reseıdiń Astrahan oblysymen shekaradaǵy Qıǵash ózeninen alynady.
«Magıstraldyq Sýaǵyzǵysy» JShS-niń málimetine súıensek, organoleptıkalyq kórsetkishter boıynsha tehnıkalyq sýdyń sapasy ózgerýi múmkin.
Óıtkeni, «Astrahan-Mańǵyshlaq» magıstraldyq sýaǵyzǵysyn qaıta qurý jáne keńeıtý jobasynyń birinshi kezegi iske asyrylyp jatyr. Osy joba sheńberinde 56-207 shaqyrym magıstraldyq qubyr jolynyń jańa ýchaskesi paıdalanýǵa berilgen.
Atyraý oblystyq sanıtarııalyq-epıdemıologııalyq baqylaý departamenti basshysynyń orynbasary Aıgúl Ysqaqovanyń aıtýynsha, Qulsary qalasyndaǵy aýyz sý sapasyna udaıy monıtorıng júrgizilip keledi.
«Sý tasqyny bolǵannan beri aýyz sý sapasyna baılanysty 286 synama alyndy. Al, sońǵy kúnderi áleýmettik jelide Qulsary qalasynyń turǵyndary tarapynan shaǵym kóbeıdi. Biz turǵyndarǵa qaınaǵan sýdy tutynýdy usynamyz», - dedi Aıgúl Ysqaqova.
Eske sala ketelik, budan buryn Qulsary turǵyndarynyń 876 maly men 532 qusy tasqyn sýdan ólgenin habarlaǵan bolatynbyz.