Serik Ergeshov Qyzylorda oblysy Polıtsııa departamentiniń bastyǵy bolyp taǵaıyndaldy

<p>QYZYLORDA. KAZINFORM &ndash; Búgin oblys ákimi Nurlybek Nálibaevtyń tóraǵalyǵymen ishki ister organdaryndaǵy kadrlyq ózgeriske oraı aktıv ótti.</p>

Oǵan Іshki ister mınıstriniń orynbasary Sáken Sarsenov, selektorlyq rejımde qala, aýdan ákimderi, basqarma, departament, quqyq qorǵaý organdarynyń birinshi basshylary men ardagerler qatysty.

2023 jyldyń mamyr aıynan Qyzylorda oblystyq polıtsııa departamentiniń bastyǵy qyzmetin atqarǵan Ablazımov Mahsýdhan Nuǵmanuly Іshki ister mınıstriniń buıryǵymen qurmetti zeınet demalysyna shyqty. 

Foto: Qyzylorda oblysy ákimdigi

Jıynda aımaq basshysy Qyzylorda oblystyq polıtsııa departamentiniń jańa bastyǵy Ergeshov Serik Júrsinbaıulyn tanystyrdy.

– Memleket basshysy «Qylmyspen kúresý jáne qoǵamdyq tártipti saqtaý – asa mańyzdy mindet. Bul – jaýapkershiligi óte úlken jumys. Elimizdiń árbir azamaty ózin qaýipsiz sezinýge tıis. Ol úshin quqyq qorǵaý júıesi úılesimdi ári tıimdi jumys isteýi qajet» dep atap ótken bolatyn. Polıtsııa organdarynyń jumysyn kúsheıtý, qoǵamdyq qaýipsizdikti saqtaý, quqyq qorǵaý salasynda pármendi sharalar qabyldaý basshylyq quramnyń nátıjeli is-qımylyna tikeleı baılanysty. Іshki ister organdary – qoǵamda quqyq tártibin, azamattardyń qaýipsizdigin qamtamasyz etetin mańyzdy qurylymdardyń biri. Ásirese, saqshylardyń kásibı qyzmeti – zor jaýapkershiligimen, táýekelshildigimen, qıyndyqqa tótep beretin tózimdiligimen erekshe qundy ári mártebeli. Bizge qoǵam tynyshtyǵyn kúzetip, qıyn jaǵdaıda shuǵyl ári batyl sheshim qabyldap, qyzmettik paryzyn adal atqara alatyn polıtsııa qyzmetkerleri kerek. Quqyq qorǵaý organdarynyń jumysyn júıeli ári ońtaıly etý úshin ákimdik turaqty qoldaý kórsetip keledi. Jaýapkershiligi zor, kúrdeli salada Serik Júrsinbaıulynyń bilimi men biliktiligi, kásibıligi, paıymdy basshylyǵy, jınaqtaǵan mol tájirıbesi jetedi dep sanaımyz, – dedi N.Nálibaev.

Májiliste Іshki ister mınıstriniń orynbasary Sáken Sársenov jańa basshynyń eńbek jolyna toqtalyp, qyzmetine sáttilik tiledi. Sonymen qatar, Qyzylorda oblysynyń prokýrory Rızabek Ojarov, oblystyq ardagerler keńesiniń tóraǵasy Serik Dúısenbaev, oblystyq polıtsııa departamenti ardagerler keńesiniń tóraǵasy Serikbol Tuńǵyshbaı, basqa da sala ardagerleri óz quttyqtaýlaryn jetkizdi.

Serik Júrsinbaıuly Ergeshov 1979 jyly dúnıege kelgen. Eńbek jolyn 1996 jyldan ishki ister organdarynda bastaǵan. Uzaq jyldar boıy OQO ІІD Shymkent qalasynyń ishki ister basqarmasynda túrli basshylyq qyzmetter atqarǵan. 2019 jyldan Shymkent qalasy PD bastyǵynyń orynbasary qyzmetinde boldy.

BQO Polıtsııa departamentiniń kadrlyq quramynda ózgerister bolǵanyn jazǵan bolatynbyz.