Serikbaı Trumov Úkimet basshysynan gaz óńdeý zaýytynyń qurylysyn jedeldetýdi surady

ASTANA. QazAqparat - Senator Serikbaı Trumov Úkimet basshysy Álıhan Smaıylovtyń atyna joldaǵan depýtattyq saýalynda Jańaózende ornalasqan gaz óńdeý zaýytynyń qyzmetine qatysty túıtkilderdi jetkizdi, dep habarlaıdy QazAqparat tilshisi.

Depýtattyń aıtýynsha, zaýyt jumysynda eleýli problemalar bar. Atap aıtqanda, magıstraldyq jáne kásiptik gaz qubyrlaryn, tehnologııalyq qubyrlar men jeldetý júıelerin paıdalanýdyń normatıvtik merzimi asyp ketti.

«Tehnologııalyq jabdyqtardy paıdalanýdyń normatıvtik merzimi 2 ese artty jáne tozǵan. Sorǵy-kompressorlyq jabdyq ta 97 paıyzǵa tozdy jáne moraldyq eskirgen», - dedi Serikbaı Trumov Senattyń jalpy otyrysynda.

Osy oraıda senator tótenshe jaǵdaılardyń týyndaý qaýpi edáýir artqanyn atap ótti. Senatordyń usynysy – jańa gaz óńdeý zaýytyn salý jumystaryn jedeldetý.

«Memleket basshysy atalǵan zaýyttyń elimiz úshin mańyzdylyǵyn eskere otyryp, Úkimetke jáne «Samuryq – Qazyna UÁQ» AQ-ǵa 2023 jyldyń sońyna deıin qaıtadan jańa zaýyttyń qurylysyn salý jóninde tapsyrma bergen bolatyn. Bul tapsyrma tıisti dárejede oryndalmaı jatyr. Uıymdastyrý jumystary men tıisti sheshimderdiń der kezinde qabyldanbaýynyń saldarynan, zaýyt qurylysynyń merzimi birneshe márte keıinge shegerilip, toqtap qalý qaýpi oryn alyp otyr», - dedi senator.