Serikbaı Trumov Senattyń Qarjy jáne bıýdjet komıtetiniń tóraǵasy boldy
09:30, 27 Qańtar 2022
NUR-SULTAN. QazAqparat – Búgin QR Parlamenti Senaty Qarjy jáne bıýdjet komıtetiniń tóraǵasy saılandy, dep habarlaıdy QazAqparat tilshisi.
Qoldanystaǵy zańnamaǵa sáıkes, komıtet tóraǵasy depýtattardyń arasynan, senatorlardyń usynysy boıynsha saılanady. Osy oraıda búgin Senattyń jalpy otyrysynda osy laýazymǵa Serikbaı Ótelgenuly Trumov usynyldy. Ol osyǵan deıin Mańǵystaý oblysynyń ákimi qyzmetin atqaryp, al 2021 jylǵy qyrkúıekten bastap Senat depýtaty boldy.
Ashyq daýys berý arqyly sheshim qabyldanyp, Qarjy jáne bıýdjet komıtetiniń tóraǵasy laýazyna Serikbaı Trumov bekitildi.
Buǵan deıin habarlanǵandaı , osyǵan deıin Senattyń Qarjy jáne bıýdjet komıtetiniń tóraıymy laýazymyn Olga Perepechına atqarǵan edi. Búgin palatanyń jalpy otyrysynda ol atalǵan komıtetti basqarý qyzmetinen bosatylyp, Senat tóraǵasynyń orynbasary laýazymyna saılandy.