Serikbaı Trumov: Men úshin týǵan jerimniń ár tasy qymbat

AQTAÝ. QazAqparat - Mańǵystaý oblysynyń ákimi Serikbaı Trumov qoǵamda qyzý talqylanyp jatqan Bozjyra mańynda vızıt-ortalyq salýǵa baılanysty pikir bildirdi, dep habarlaıdy QazAqparat.

Eldiń damýynda keleli máseleler ár ýaqytta da bolǵan jáne bola beredi.

Másele kóterilgen kezde el azamattary bas kóterip, halyqqa jol siltep, bılikke zııaly qaýymnyń ustanymyn jetkizedi, buǵan tarıh kýá. Bizdiń ólkede de el azamattarynyń pikiri basty nazarda.

«Men úshin týǵan jerimniń ár tasy qymbat. Men de óńir perzenti retinde kórkem tabıǵatymyzdyń buzylmaı saqtalýyn qalaımyn. Sonymen qatar óńir basshysy bolǵandyqtan, halyqqa jumys taýyp berý, el ekonomıkasyn kóterý - meniń basty paryzym.Sizder týǵan dalamyzdyń bir bólshegin maqsaty bólek bóten bireýge qıyp bere salady eken dep oılamańyzdar. Barlyǵy da zań aıasynda iske asyrylady»,- -dedi ol.

Sondaı-aq atqarýshy organ óz tarapynan ınvestorǵa tabıǵatty qorǵaý, jergilikti kásipkerlikti qoldaý, halyqtyq qundylyqtarymyzdy saqtaý, týrızmdi álemdik órkenıetpen, adamı, mádenı normalardy saqtaı otyryp júrgizý boıynsha naqty talaptar qoıyp, qatań qadaǵalaıtyn bolady.

«Munaı qory da bir kúnderi taýsylady. Qazir bizge týrızmdi damytý arqyly tabysqa qol jetkizý paıdaly bolyp otyr. Oǵan tabıǵı múmkindigimiz de, teńizimiz de, kórikti jerlerimiz de bar. Óńirge qyrýar ınvestıtsııanyń kelýiniń arqasynda týrızm, soǵan qosa shaǵyn jáne orta bıznestiń (qolóner, ulttyq taǵam, aýyl sharýashylyǵy, t.b.) qanat jaıýyna, ınfraqurylymdardyń damýyna, jol qurylysynyń órkendeýine, jolaýshylar tasymalynyń zamanaýı deńgeıge kóterilýine, jastardy turaqty jumyspen qamtýǵa qol jetkizemiz»,- dedi S.Trumov.

Mańǵystaýda bıyl ashylǵan «RixosWaterWorld» qonaqúı kesheninde 700-deı jańa jumys orny qurylyp, jergilikti turǵyndar qyzmet etýde, tıisti salyq óńir qazynasyna turaqty túsip otyr. Endi, shyn máninde, ishki týrızmniń áleýeti kúsheıýi naqty kórinis tabýda.

«Biz budan utpasaq, utylmaımyz. Investor aqsha salamyz dep, ózi kelip tursa, nege odan bas tartamyz?! Mundaı múmkindik kúnde bola bermeıdi. Sondyqtan, Bozjyradaǵy jobany iske asyrýymyz kerek. Ol el bolashaǵy úshin kerek.

Jobaǵa baılanysty pikirler ekige jarylǵanyn da baıqap otyrmyn. Pikir alýandyǵy qoǵamdy damytady, alǵa súıreıdi. Biraq ár azamattyń tańdaýy men jeke ustanymyn qurmetteý mádenıeti eskerilýi tıis», - dedi aımaq basshysy.

Aıta keteıik, buǵan deıin Mańǵystaý oblysynyń Quryq aýylynda «Vızıt ortalyǵy» jumys jobasynyń «Qorshaǵan ortaǵa áserin baǵalaý» bólimi boıynsha ashyq otyrys nysanyndaǵy qoǵamdyq tyńdaý ótkenin jazǵan bolatynbyz.