Serik Jumanǵarın Krasnoıar ólkesiniń gýbernatory Aleksandr Ýsspen kezdesti

ASTANA. QazAqparat - Taraptar el múddeleri toǵysqan tustardy talqylap, ózara is-qımyldy odan ári damytý joldaryn belgiledi, dep habarlaıdy primeminister.kz.

Kezdesý barysynda Serik Jumanǵarın Qazaqstan Reseı Federatsııasymen aımaqaralyq yntymaqtastyqty keńeıtýdi maqsat etip otyrǵanyn aıtty.

2022 jyldyń І jartyjyldyǵynda Qazaqstan men Krasnoıar ólkesi arasyndaǵy syrtqy saýda aınalymy ótken jyldyń sáıkes kezeńimen salystyrǵanda 77,7% artyp, $75 217,7 myńdy qurady.

Qazirdiń ózinde oblystyń 200-ge jýyq kásiporny Qazaqstanmen saýda baılanysyn ornatqan.

2022 jyldyń tamyzynda Aqmola oblysynyń ókilderi men Krasnoıar ólkesi gýbernatorynyń ákimshiligi arasynda saýda-ekonomıkalyq, ǵylymı jáne gýmanıtarlyq salalardaǵy yntymaqtastyq týraly kelisimge qol jetti.

Sonymen qatar kezdesýge qatysýshylar Qazaqstan men RF túrli baǵyttar boıynsha ózara baılanystardy nyǵaıtý úshin zor múmkindikterge ıe ekenin atap ótti.

Óz kezeginde Reseı Federatsııasynyń Krasnoıar ólkesiniń gýbernatory Aleksandr Ýss Reseı eksportynyń jańa naryqtary men balama logıstıkalyq baǵyttaryn izdeýge qyzyǵýshylyq bildirdi.

Óńir basshysy Krasnoıar ólkesiniń básekelestik artyqshylyqtary týraly aıtyp, qazaqstandyq kásipkerlerdi alıýmınıı óńdeý, orman ónerkásibi kesheni jáne orman sharýashylyǵy salasynda yntymaqtasýǵa shaqyrdy.

Sondaı-aq óńirde mashına jasaý jáne metall óńdeý, aýyl sharýashylyǵy, tamaq ónerkásibi, aǵash óńdeý, hımııa salalarynda mańyzdy jobalar bar.

Kezdesý sońynda qatysýshylar taraptar arasynda tikeleı baılanystardy jedel jolǵa qoıý úshin kásiporyndar tizbesimen almasýǵa kelisti.

Foto: primeminister.kz