Serik Jumanǵarın: «Qorǵas» saýda-ekonomıkalyq jáne týrıstik áleýet esebinen damıtyn bolady
Serik Jumanǵarın ondaǵy «Nur Joly» kedendik ótkizý pýnkti, «Qorǵas-Shyǵys qaqpasy» AEA óndiristik aımaǵy, bagaj, logıstıkalyq termınaldar, «Qorǵas» halyqaralyq shekara mańy yntymaqtastyǵy ortalyǵynyń (HShYO) saýda jáne mádenı ortalyqtarynyń qurylys oryndaryna bardy.
«Qorǵas» HShYO – saýda, ekonomıkalyq, ınvestıtsııalyq yntymaqtastyq, týrızmdi damytý kesheni. Ol Qazaqstan Respýblıkasy men Qytaı Halyq Respýblıkasynyń shekaralas aımaqtarynda ornalasqan qazaqstandyq jáne qytaılyq bólikterden turady. 2017 jyly «Qorǵas» HShYO qazaqstandyq bóliginiń aýmaǵyna arnaıy ekonomıkalyq aımaq (AEA) mártebesi berildi. 2019 jylǵy maýsymda basqarýshy kompanııa quryldy, sodan keıin «Qorǵas»HShYO«AEA ınvestorlary onyń qatysýshylary bolýǵa jáne kózdelgen jeńildikterdi paıdalanýǵa múmkindik aldy.
-»Qorǵas«halyqaralyq ortalyǵynyń damý strategııasyn biz saýda-ekonomıkalyq jáne týrıstik áleýetti ulǵaıtýǵa negizdeıtin bolamyz, - dep atap ótti Serik Jumanǵarın. – Investorlardyń laıyqty jobalary bar, mysaly, qolónershiler qalasy, etnomádenı keshen, jaıly qonaq úıler men meıramhanalar salý. HShYO bazasynda biz elektrondyq kommertsııany, qazaqstandyq qyzmetter men taýarlardyń eksportyn, ekijaqty saýdany damytý úshin jaǵdaı jasaýymyz kerek. Ol úshin barlyq obektilerge tekserý júrgizip, ınvestorlarmen kelissózder júrgizip, biryńǵaı josparlaý arhıtektýrasyn quryp, adamdar kirý jáne shyǵý kezinde bagajdy kedergisiz tapsyryp, ala alatyndaı ınfraqurylymmen, bagaj bólimshesimen máselelerdi sheshýimiz qajet. «Qorǵas-Shyǵys qaqpasy» AEA aýmaǵynda aýyr júk kólikterine baılanysty barlyq óndiristik jáne kóliktik-logıstıkalyq bólik shoǵyrlanýy tıis.
«Qorǵas HShYO» AEA aýmaǵynda 2017 jyldan bastap 3,8 ga jer teliminde «Qolónershiler qalasy» ınvestıtsııalyq jobasy júzege asyrylýda. Investıtsııa kólemi 10 mlrd teńge, qurylys alańy 20 000 sharshy metr, 450-den astam jumys ornyn qurýdy qarastyrady. Qolónershiler úı-jaılaryn jáne kórme pavılondaryn uıymdastyrýdy usynady. Ol Qazaqstandaǵy qolóner salasyn ilgeriletýge jáne damytýǵa yqpal etedi.
«Nomad» etnomádenı kesheni - bul joba aıasynda Jibek joly boıynda ornalasqan ejelgi kóshpendiler qalalarynyń beıneleri jańǵyrtylady. Qonaqtardy Qazaqstanda turatyn halyqtardyń salt-dástúrlerimen, mádenıetimen, ónerimen tanystyrýǵa múmkindik beredi.
Sondaı-aq «Qorǵas» HShYO aýmaǵynda, burynǵy «Jarkent» keden beketi ǵımarattarynyń negizinde «Qazaqstan» kórme ortalyǵyn qurý josparlanýda. Ekspozıtsııalardy qurýǵa el ekonomıkasynyń jetekshi salalarynyń qazaqstandyq kásiporyndary tartylady. Jańa tehnologııalardyń kómegimen Qazaqstannyń tabıǵı, mádenı, sáýlettik, tarıhı nysandaryn kórsetetin eksponattar jasalatyn bolady.
Elektrondyq kommertsııany damytý úshin 2019 jyly HShYO aýmaǵynda Eýrazııalyq ekonomıkalyq odaq elderinen basqa EO, AQSh, Brazılııa elderine pochta jóneltimderi túrinde taýarlardy qabyldaý, saqtaý jáne odan ári jóneltý boıynsha qyzmetter kórsetýge múmkindik beretin Bond qoımasy quryldy. 2019 jylǵy qarashadan 2020 jylǵy qańtarǵa deıin salmaǵy 30 tonnadan asatyn Eýropalyq Odaq, AQSh jáne Kanada elderine kommertsııalyq taýarlar jóneltildi. 2020 jyldyń qańtarynda pandemııaǵa baılanysty Qytaı shekarasynyń jabylýyna baılanysty keden qoımasynyń qyzmeti toqtatyldy.
Servısti jańǵyrtý logıstıkalyq ınfraqurylymdy jaqsartýǵa jáne jetildirýge, ınvestıtsııalar tartý úshin qolaıly klımat qurýǵa yqpal etedi, kedendik resimdeýdi jeńildetedi jáne halyqaralyq poshta jóneltilimderiniń tranzıtin jolǵa qoıýǵa múmkindik beredi.
Sonymen qatar, Alibaba Group kompanııasynyń reseılik keńsesi men Qazaqstannyń ınvestıtsııalyq kompanııasy «Qorǵas» HShYO aýmaǵynda Bond qoımasyn birlesip salý týraly kelisimge keldi. «Ozon» ınternet - dúkeni osyndaı qoımany ashýǵa belsendi qyzyǵýshylyq tanytýda.