Serik Jumanǵarın KazakhExport-tyń saqtandyrý quraldaryn paıdalanýdy keńeıtýdi usyndy

ASTANA. QazAqparat – Qazaqstan-Tájistan bıznes forýmynda Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın KazakhExport kompanııasynyń saqtandyrý quraldaryn paıdalanýdy keńeıtýdi usyndy, dep habarlaıdy QazAqparat tilshisi.

«Elderimizdiń arasynda sheshilmegen másele joq ekenin bólek atap ótkim keledi. Degenmen, mynadaı máseleler ashylyp otyr. Otandyq KazakhExport kompanııasynyń saqtandyrý quraldaryn paıdalanýdy keńeıtý usynylady. Bul rette biz bızneske usynatyn barlyq qarjylyq múmkindikti, onyń ishinde saýdany qarjylandyrýdyń jańa quralyn durys qoldaný mańyzdy. Saýda mıssııalaryn júrgizý tájirıbesi de jalǵasady. Bul múddeli kompanııalar arasynda uzaq merzimdi jáne ózara tıimdi baılanystar ornatýǵa yqpal etedi», - dedi Serik Jumanǵarın.

Sonymen qatar ol búgingi bıznes forým eki el arasyndaǵy is-qımyldyń jańa baǵyttaryn belgileýge arnalǵanyn basa aıtty.

«Bizdiń taýar aınalymymyzdy arttyrý boıynsha júktelgen barlyq mindetke qol jetkizýge múmkindik beretin barlyq jaǵdaı jasalǵan. Bul forým Qazaqstan men Tájikstannyń ekijaqty ekonomıkalyq yntymaqtastyǵyn odan ári tereńdetýge múmkindik beretinine senimdimin», - dedi vıtse-premer.