Serik Jumanǵarın Bırja komıteti ne úshin qurylǵanyn túsindirdi
Serik Jumanǵarınniń aıtýynsha, búginde agenttiktiń aldyna monopolııaǵa qarsy retteý júrgizip, básekelestikti damytyp qana qoımaı, kásipkerler úshin múmkindikter men yntalandyrý sharalarynyń aıasyn keńeıtý mindeti qoıylyp otyr. Ásirese taýar naryǵynda baǵa belgileý kezinde beleń alatyn burmalaýshylyqtardy joıý, kásipkerlikke memlekettiń kıligýin tómendetý, ákimshilik ekonomıkalyq kedergilerdi joıý agenttik ókilderiniń basty baǵdary bolmaq.
«Básekelestikti damytý jónindegi ulttyq jobany múddeli memlekettik organdarmen birlesip daıyndadyq. Memlekettik josparlaý isinde kópshilik pen sarapshylardyń talqylaýyna shyǵarylǵan jobalardyń biri bolyp otyr. Onyń negizinde básekege qabiletti saıasatty engizý jatyr», - dedi Serik Jumanǵarın QazAqparat jýrnalısterimen kezdesýinde.
Ol sondaı-aq ulttyq joba memleket qolǵa alǵan júıeli reformalardy tejeıtin úsh túrli retteýshi kedergini sheshýge baǵyttalǵanyn atap ótti. Agenttik tóraǵasynyń aıtýynsha, atalǵan úsh kederginiń birinshisi - qajetti ınfraqurylym men resýrstarǵa qoljetimdiliktiń árkelki bolýy.
«Ulttyq joba aıasynda biz 3 bazalyq baǵytty bóldik. Kórsetilgen baǵyttar boıynsha neǵurlym túıindi salalar men jobalar aıqyndalǵan. Olardy tarqatý sheshýshi qadam bolady. Osylaısha, ulttyq jobada negizgi tizbek qalyptastyratyn eń mańyzdy jobalar shoǵyrlanǵan jáne olardyń negizgi mindeti - eldegi básekelestik saıasatyn damytatyn baǵdar qurý», - dep tolyqtyrdy agenttik basshysy.
Ol, sondaı-aq, jýrnalısterge bırjalyq saýdanyń damýy týraly da aıtyp berdi.
2020 jyldyń qazan aıynda Agenttiktiń quryldy da, taýar bırjalarynyń qyzmetine memlekettik saıasatty qalyptastyrý ókileti berildi. Óıtkeni bırjalyq saýda ishki jáne syrtqy saýdanyń ajyramas bóligi bolyp tabylady. Básekelestikti qorǵaý jáne damytý agenttiginiń janynan bırjalyq komıtet qurylyp, keńes berýshi vedomstvoaralyq organǵa aınalǵan bolatyn. Sol bırja komıteti kómir, avıatsııalyq otyn, gaz jáne munaı ónimderiniń bırjalyq saýdasyn qyzdyryp júrgen satýshylary men satyp alýshylardyń basyn qosyp, birneshe ret otyrystar ótkizgen. Osy kezdesýlerden keıin bırjadaǵy saýda-sattyqtyń jańa tásilderi paıdalanyla bastady.
«Áli de kóptegen másele bar. Jalpy bul iste tártip ornatý turǵysynan aýqymdy jumys jasalý kerek. Biz eldegi bırjalyq qyzmettiń sapaly jáne perspektıvaly damýy úshin jaǵdaı jasaýǵa nıettimiz. Memlekettiń qazirgi saıasatynda da osyndaı ustanym basym sıpatqa ıe ekenin bilesizder», - deıdi Serik Jumanǵarın.
Serik Jumanǵarın jýrnalıstermen kezdesýinde Air Astana kompanııasyna aıyppul qalaı salynǵanyn aıtty.