Serik Jumanǵarın básekelestikti tunshyqtyryp otyrǵan 3 negizgi kedergini atady

NUR-SULTAN. QazAqparat – QR Pralamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine básekelestikti damytý máseleleri boıynsha ózgerister men tolyqtyrýlar engizý týraly» Zań jobasy birinshi oqylymda talqylandy, dep habarlaıdy QazAqparat tilshisi.

Qujatty depýtattarǵa Básekelestikti qorǵaý jáne damytý agenttiginiń tóraǵasy Serik Jumanǵarın tanystyrdy.

«Búgingi kúni elimizdegi básekelestiktiń jaı-kúıi negizgi taýar naryqtaryndaǵy shoǵyrlanýdyń jáne ekonomıkaǵa memlekettiń qatysýynyń joǵary deńgeılerimen sıpattalady.

Osyǵan baılanysty, bizdiń jumysymyz jáne zań jobasynyń normalary memlekettiń ekonomıkaǵa qatysýmen qandaı da bir túrde baılanysty úsh negizgi retteýshi kedergilerdi sheshýge baǵyttalǵan:

Birinshi. «Negizgi qýatqa» shekteýli qol jetimdilik. Bul ınfraqurylym, resýrstar, olarǵa qol jetkizbesten bıznes tutynýshylarǵa qyzmet kórsete almaıdy.

Ekinshi. Baǵany burmalaý. Búgingi tańda Kásipkerlik kodekste baǵalyq retteýge jatatyn taýarlardyń 14 túri kózdelgen. Іs júzinde ákimshilik baǵany baqylaý sharalary qoldanylatyn taýar naryqtary odan da kóp», - dedi agenttik tóraǵasy.

Sondaı-aq, ol jekelgen kompanııalarǵa bılik beretin quqyqtyq aktiler qabyldaý áli tyıylmaı turǵanyn atady.

«Úshinshi másele – selektıvti qamqorshylyq nemese favorıtızm. Bul jekelegen kompanııalarǵa naryqtyq bılik beretin quqyqtyq aktilerdi qabyldaý, memlekettik qoldaý sharalary, ádette, básekelestiktiń allokatıvti tıimdiligin burmalaıtyn ataýly sıpatta bolady», - dedi Serik Jumanǵarın.