Serik Jumanǵarın: Aqtóbe oblysy «Aýyl amanaty» jobasyn iske asyrýda kósh basynda

AQTÓBE. QazAqparat – Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın Aqtóbe oblysyna jumys sapary aıasynda «Aýyl amanaty» jobasynyń iske asyrylý barysymen tanysty, dep habarlaıdy QazAqparat.

Joba maqsaty – aýyldyq eldi mekenderdegi ómir súrý deńgeıin arttyrý, halyqty jumyspen qamtýǵa járdemdesý jáne aýyl áleýetin tıimdi paıdalaný. Ol QR Prezıdenti Qasym-Jomart Toqaevtyń aýyl halqynyń ómir súrý deńgeıin arttyrý tapsyrmasyna oraı júzege asyrylýda.

Mártók aýdany Sarjansaı aýylynda Serik Jumanǵarın men oblys ákimi Eraly Toǵjanov qus sharýashylyǵy boıynsha nesıe alyp, 300 taýyq pen qaz satyp alǵan Roza Shárimbaevanyń jeke qosalqy sharýashylyǵyna bardy.

Buǵan deıin jumyssyz otyrǵan aýyl turǵyny jobanyń arqasynda jumyrtqa men qustaryn satyp, turaqty tabys taýyp otyr. .

Sondaı-aq munda «Aýyl amanaty» jobasyna qatysýshylar ónimderin usynǵan kórme uıymdastyryldy.

«Aýyl amanaty» sharttaryna sáıkes aýyl turǵyndary shaǵyn jáne orta bıznes ashyp, ony damytýǵa 8,625 mln teńgeden (jekelegen sharýashylyqtar úshin) 27,6 mln teńgege (kooperatıvter úshin) deıingi somada 2,5%-ben jeńildetilgen nesıe ala alady. Nesıe berý merzimi 60 aıdy quraıdy, jyljymaly jáne jyljymaıtyn múlikti kepil retinde qoıýǵa bolady. Sonyń ishinde el tarıhynda tuńǵysh ret eń shalǵaı eldi mekenderdegi aýyl úıleri kepilge alynady.

Bul rette Aqtóbe oblysynda «Aýyl amanaty» jobasyn iske asyrý tetigi elimizdiń basqa óńirlerinen ózgeshe. Shaǵyn nesıe berýmen qatar, munda taýarlyq nesıeleý negizinde mal bıýdjetten tys qarajat esebinen beriledi, alynǵan mal tólmen qaıtarylady. Nesıeleýdiń bul túrin kepilge qoıatyn múlki joq azamattar paıdalana alady.

Qazirgi tańda 311 otbasyna 3,9 myńnan astam mal berildi. Búgin Sarjansaıda bes sharýa qojalyǵy taǵy birneshe otbasyna 70 bas iri qara men usaq mal berdi.

«Men óńirdegi jobanyń barysymen tanysýǵa keldim jáne baǵdarlamanyń jaqsy iske asyrylyp jatqanyn kórip otyrmyn. Aqtóbe oblysy – «Aýyl amanaty» jobasyn iske asyrý boıynsha kósh basynda keledi», - dep atap ótti Serik Jumanǵarın.

Budan ózge, Aqtóbe oblysynda «Aýyl amanaty» jobasy bilim berý, densaýlyq saqtaýdy damytýǵa, aýyldardy abattandyrý jáne qoǵamdyq qaýipsizdikti qamtamasyz etýge baǵyttalǵan kishi jobalarmen tolyqtyrylǵan.

Jobany iske asyrý bastalǵaly beri óńirdiń birneshe aýylynda jumyssyzdyq joıylyp, halyqtyń jergilikti óndirilgen ónimdermen qamtamasyz etilý kórsetkishi artty. Jobaǵa qatysýshylar oblys ortalyǵynda ózderi óndirgen ónimderin satatyn «Aýyl amanaty» mamandandyrylǵan dúkenderin ashýda.

Búginde oblys turǵyndary «Aýyl amanatyna» qatysý úshin 1,4 myńnan astam ótinim bergen, onyń ishinde jalpy somasy 4,5 mlrd teńgeni quraıtyn 1127 joba maquldandy.